حضرت علی اصغر ع
یانار اودلارا سالوبدی منی اهل شام الهی
سوسوز اوخلانوب الیمده سودامر بالام الهی
🌺🌺🌺🌺🌺
نجه تاب ایدر آناسی- گوره اوخلانوب بالاسی
آلیشوردی تشنه لیقدان، دوتوب اود الولانوردی
آناسی گوروب بو حالی چکوب آه اودلانوردی
چابالوردی اللریمده جگری زبس یانوردی
سولی بیر اوخیله دلدن دوشوب اولدی رام الهی
🌺🌺🌺🌺🌺
یری واردی نالم عرشه بو گون ای خدا اوجالسون
شرر فغان و نالم فلکه شراره سالسون
کمکیم که یوخ، کیمیم وار بالامی الیمدن آلسون
ستمیله آل هاشم قیریلوب تمام الهی
🌺🌺🌺🌺🌺
آناسیندان ایمدی آلدیم بونی مین دلیله یارب
نجه قیتروم من ایلوم اونا ایمدی کشف مطلب
بیچیلوب بوغازی، قانی بدنین ایدوب مخضّب
آناسین مَلَر قویوبدور سپه لئام الهی
🌺🌺🌺🌺🌺
منی یاندیرور بولورسن بالامین بو اوخ یاراسی
گیده بولمورم خیامه، گلور آغلاماق صداسی
بالاسین بو نوع گورسه اوزین اُلدورر آناسی
بیر آنا مگر بو ظلمه گتورر دوام الهی
🌺🌺🌺🌺🌺
من امامم عالمینه بولوری بو قوم یکسر
عجب احترام ایدولّر منه بو گروه کافر
گهی آد قویولّا یاغی، گهی ناسزا دیولّر
منی خارجی بولولّر سپه ظلام الهی
🌺🌺🌺🌺🌺
بو فراتی ایلمیشدون سن الهی مَهر آناما
ولی ویرمدی بو لشکر بیر ایچیم منیم بالاما
صف حشریده دوران گون هامی صف بصف نظامه
اوزون آل بو اشقیادن او گون انتقام الهی
🌺🌺🌺🌺🌺
بو قدر جفا روادور اولا بیر غریب زاره
هامی یار و جان نثاری دوشه یرده پاره پاره
بویانا ستمله قانه الی اوسته شیرخواره
ایده لر بنی امیّه اونی تلخکام الهی
🌺🌺🌺🌺🌺
غم روزگار ایدوبدور منی ای خدا دل افکار
نه انیس وار نه مونس، نه بو یالقوز ایوده غمخوار
نسباً حسینیم من هم حسینیوه عزادار
بو حسیندن ال گوتورمم نه قدر وارام الهی
🌺🌺🌺🌺🌺🌺
