حضرت علی اصغر ع

یوزون سولموش قزل گل تک سوسوزلوقدان علی اصغر

اورک سوزیندن اود دوتموش لب عطشان علی اصغر

گوزوم بو حالی گوردوقجا آخار دامانینه اشکی

اولوبدور بارش چشمیم بهاری ابرینون رشکی

امیدیم اولدی حرمان پاره لندی تا عمون مشکی

یقین ایتدیم که لب تشنه ویررسن جان علی اصغر

سواد دود آهیم تیره پوش ایلر بو آفاقی

ایچر قان، سو کیمی بولّم وصال دوست مشتاقی

بلی بزم وفاده باده قاندور درد و غم ساقی

بیله بیر مسته لایق محفل جانان علی اصغر

ریاضت آشنا مشتاقینه امر مقدّردی

مرید عشق اولان فرق ایلمز اکبردی اصغردی

بو یولدا سهلیدور عشّاقه هر نه میل دلبردی

شهادتدور سنه قسمت منه هجران علی اصغر

نه رخسارونده کی لطف و طراوت واردی بیر گلده

نه وار منده اولان شور و نوا شوریده بلبلده

صفا قالماز اوغول سولسا یوزون سوری و سنبلده

یانار لاله، اولار غنچه اورکدن قان علی اصغر

ازلدن رشته ی عشق و محبّت اولدی پابندون

او شور عشقیدن نی تک نوایه گلدی هر بندون

قالار جاوید عطشان لعلیده آثار لبخندون

نجه داغ غمون وار دلده جاویدان علی اصغر

مدار کونیده تا سیر ایدوب گردونه ی دوران

سنون تک شیرخواره گورمیوب گهواره ی امکان

غذا لخت جگر، دایه غم و اندوه، سو القان

نوازشگر سه شعبه زهرلی پیکان علی اصغر

دیمم سالموش عطش سوزی شرار غم دل و جانه

سراپا پیکرون دونموش عطشدن نار سوزانه

یتر بیر نحویله بو مسئله آخِرده پایانه

ولی یوخدور غم هجره داخی پایان علی اصغر

فغانیم اوج ایدر هجران غمینده انجم و ماهه

لوای غم ساچار آهیم فراز سبز خرگاهه

آنان حالین بولر باخدوقجا گوز شمع شبانگاهه

که نه نوعی یانار بی ناله و افغان علی اصغر

عزیز فاطمه نه چکدی بو قوم اراذلدن

دگل بیر غم که هرگز آیریلا بیر لحظه بو دلدن

دیمم اولما رها حلّال مشکل اوغلی مشکلدن

شهادتله اولار هر مشکلی آسان علی اصغر

نه اهل دیر سویر قصد سیاحتله بیابانی

که ایلر جذبه ی یاریله سیر باغ و بستانی

بو شوقیله هوای دشت ایدوب «مقصود» و «حقّانی»

که «عابد» ورد ایده اسمون سنون هر آن علی اصغر

🍁🍁🍁🍁🍁🍁🍁🍁