حضرت علی اصغر ع

دوباره شوره گلیبدور گوگول که فرصتدور

قلم دایانما که حقدن سنه عنایتدور

 

مرام و مقصدیوی پاک ائله خلوصیله

یاز اهل بیته ریاسیز که یاخچی نیتّدور

 

عزیز فاطمنون درگهینن ال چکمه

حسینه خدمتون اولسون ثمرلی خدمتدور

 

مقام و منزلت آختارماز عاشق صادق

حسینچی شخصه بو ائیش چون بویوک حقارتدور

 

او شخصی که ائلسه فاطمه بالاسی قبول

ایکی جهاندا یازیبلار که غرق عزّتدور

 

او نوکری که وئره شه اونا مقام صغیر

مقابیلینده کبیر شاه لر رعیّتدور

 

گچ اصل مطلبه یاز یازدیقون «جونمردا»

که شهه دن ایسته صله بو گونی ولادتدور

 

ال آتمیسان ائله بیر دامنه ائله شخصه

که رتبه ده باب الحوائجیله شهرتدور

 

آدی علی ، اوزی اکبر ، اگرچه اصغردی

کرمده لطف ده دریای بی نهایتدور

 

مدینه روشن اولوبدور جمال اصغردن

منوّر ایلیوب هر یئرلری که ظلمتدور

 

دسم که گوندی بونون نورینه ضحا[1] چاتماز

دئسم که آیدی غلطدور که آیه آیتدور

 

صفا وروبدی تمام عالمه وجودی بونون

آتا آناسی کیمین چون که پاک سیرتدور

 

نه تک مدینه که عالملری ائدوب خوشبو

بو گلستان علی ده گل معطّردور

 

گنه غلط دئدوم هاردان گله شباهتی وار

او هانسی گل دی بوگل تک که با طراوتدور

 

نه گون نه آی نه ستاره نه  گل نده گلشن

که قورتولان دگول اوصافی بی نهایتدور

 

ائدلّر حمد و ثنا حضرت خداونده

حسینه بو بالا حقدن صفالی نعمتدی

 

گلن گلور آلور آغوشینه اوپور یوزونی

بو نازدانیه هردم یتن محبّتدور

 

آناسی غرق شعفدور ئوپور الین یوزونی

دولانور هی باشینا نو گل امامتدور

 

آلاندا اصغری آغوشه جان کیمی آناسی

آناسی فاطمه نون قلبی پر ز محنتدور

 

قلم دولان گینه دشت بلایه ایله گذر

سو یولارین کسیب اعدا خیمه لر قیامتدور

 

عطش ائله سارادیبدور بالارون رنگین

که خیمه لرده سودان هر دقیقه صحبتدور

 

آنا یانور بالا آغلور چالور مدام ال ایاق

بوباردن آدی سقّا اولان خجالتدور

 

آناسی شرم ائدور عبّاس حضورینه گتسین

دئسون بالام ئولوری ایله هرنه فکرتدور

 

ولی ممانعت ایلور حیا بو بانو ده

زبس که صاحب شأن وقار و رقّتدور

 

دئیر اوغول نه صودوم وار نه خیمه لرده سو وار

بیر آز دا تاب ائله آخر گوراخ نه حکمتدور

 

عمون سو قولی وریب صبح آچیلسا گر اوغلوم

اگرچه سن اوچون آخر بو امر زحمتدور

 

اوزون که باب الحوایج سن ای علی اصغر

علاج ائله آناوین دردینه که جانه منّتدور

 

دعا ائله من اولوم گورمیوم بو حالتون هیچ

دوتوبسان اود یانیسان وای منه نه نقمتدور

 

قوتار بو سوزلری ناراحت ایتمه زهرانی

سو صحبتی بولوسن بیر اوزون حکایتدور

 

اوقدری چال قاپوسین آلمامیش صله گتمه

که روز روزه مسرت شبِ ولادتدور