حضرت علی اصغر ع
او دم که حرمله ننگین اله تیر و کمان آلدی
ملک لر ضجّه چکدی شیعه لر خطّ امان آلدی
🍁🍁🍁🍁🍁
خبر ویر هر مریضه ناامید اولسا معالجدن
بو طفله آغلاسون تا بهره مند اولسون نتایجدن
علاجون ایسته سون بو سودامر باب‌الحوائجدن
کیمه ایتدی طبابت مزدینه اشک روان آلدی
🍁🍁🍁🍁🍁
حقیقت گورسنر قلب سلیم و چشم بینایه
ازلدن حرمله کور اولدی ساتدی دینی دنیایه
خریدار بهشته بیر اووج قان الده سرمایه
حسینون سودامر سربازی جان ویردی جنان آلدی
🍁🍁🍁🍁🍁🍁
دیزین بَرکیتدی یرده اوخ آتان بیر پهلوان مثلی
کمان پرتاب و زه تابیده اوخ برق جهان مثلی
هدف بیر آلتی آیلیق سودامر برگ خزان مثلی
حسینون خیری اولسون غنچه ویردی گلستان آلدی
🍁🍁🍁🍁🍁🍁
گور اوچ پر اوخ سودان آیری دوشن بیرماهیه نیلر
دگه دیوار مسجدده قانادسیز یاهویا نیلر
ابوالفضلی یخان بیراوخ گورون شش ماهیه نیلر
باش آیریلدی بدندن قلب زهرادن توان آلدی
🍁🍁🍁🍁🍁🍁
اوخی چکدی بوغازیندن آتوب قان مثل فوّاره
دمادم دولدوروب اوجین ایدوب عرضه خریداره
جنازه اللری اوستـه قالوب میداندا آواره
ندای احسن احسن ذات حقدن ناگهان آلدی
🍁🍁🍁🍁🍁🍁
آتانون اللری قان، یوز گوزی قان، آغ محاسن قان
بالانون ایسلادوب آغ دوشلوگین زیبا لباسین قان
اولوب باب الحوائج ایلدی تضمین بقاسین قان
عموسی حضرت عباس تک نام و نشان آلدی
🍁🍁🍁🍁🍁🍁
نظر اطرافینه سالدی اوزین تک گوردی میداندا
دیدی قارداشلاریم اوغلوم خدا غرق اولموش آلقاندا
قالان بیر سودامر سربازیمیدی ذیل پیماندا
اودا صدساله درسی آلتی آیدا بی زبان آلدی
🍁🍁🍁🍁🍁🍁
بو غمدن پارچالانمیشدی نه طاقتده داغ اولسیدی
بهارون فصلی سولمیشدی نجه عالی باغ اولسیدی
بالام ال اوسته قالمازدی ابوالفضلیم ساغ اولسیدی
گوروب قارداش سیزام اطرافیمی بو قوم کوفیان آلدی
🍁🍁🍁🍁🍁🍁
اوزون محشر گونی ای منتقم قیل عدلیلن دیوان
بو من او حرمله بو اصغر مظلوم او ناحق قان
ساتان من، مشتری سن، قان متاعیم قیمتی رضوان
اوزون ویر خیرینی یارب ساتان ساتدی آلان آلدی
🍁🍁🍁🍁🍁🍁
بالا از بسکه چیرپیندی آتانون سینه سی اوسته
ویروب جان مرغ بسمل تک ولیکن قول قاناد بسته
قویوب یوز خیمیه ساری آتا خسته بالا خسته
اوزاقدان رمزی اوّل زینب بی‌خانمان آلدی
🍁🍁🍁🍁🍁
اور‌کلندی دیدی قارداش گل خندانیوه قربان
سویا عطشان گیدوب عطشان گلن مهمانیوه قربان
الون اوسته ملک لـر آغلیـان قربانیوه قربان
بو دلسیز نیلمیشدی دشمن آخِر قانه قان آلدی
🍁🍁🍁🍁🍁
دیدی سن اولماسیدون خیمیه باجی گلنمزدیم
آناسی خیمه دن باخسیدی من تَلّی اَننمزدیم
بو حالیله که سن گوردون گوزونه گورسننمزدیم
ربابه درسی سن ویردون فلک سخت امتحان آلدی
🍁🍁🍁🍁🍁
وداعین وقتی دور باجی فراقه قوی ایدوم تمکین
عیادت ایلیوم سجّادیدن دردی تاپا تمکین
مریضین یانینه گیتماقدا امّا وار گوز‌ل آئین
گوررسن هر کسی بیر هدیه در حدّ توان آلدی
🍁🍁🍁🍁🍁
مریضه دسته‌گل باغلالّا بیرخوش رسم و عادتدی
اودور سجاده گتدیم بو گلی وقت عیادتدی
آپار ویر ایلسون ویرسون سیزه بو یاخشی فرصتدی
مریض ایلر گلی اوندان گوررسن دیگران آلدی
🍁🍁🍁🍁🍁
ویرنده هر قیزا امّا دینن آرام آل آغوشه
یواش باس باغریوا دیسگینمسین الآن گیدوب هوشه
آتوب دوتما بوغازیندن دوباره قان گلر جوشه
ویرون الدن اله بلکه رباب مهربان آلدی
🍁🍁🍁🍁🍁
آلوبلا قانلی قنداقی ئوپن الدن اله ویردی
بوغازینون یاراسین کیم گوروب زلفین یِله ویردی
ربابه نوبه چاتدی شاعیره مولا صله ویردی
سیزیلتیلان ایله نوحه دیدی فیض کلان آلدی
🍁🍁🍁🍁🍁
دیدی گرچه غموندن ئولمدیم من زنده‌یم اوغلوم
نقدری که آدون اوستومده وار پاینده‌یم اوغلوم
قصوریم اولدی سندن حشره تک شرمنده‌یم اوغلوم
منیم سینمده سن بخت اولدوزیدون، آسمان آلدی
🍁🍁🍁🍁🍁
یقینیمدور گئجه چوخ اینجیمیشدون ایمدی دینجلدون
یانوردون صبحه تک آهون اوخیله قلبیمی دلدون
ایوون آباد کوسموشدون گینه آغوشیمه گلدون
کأنّه آلتی آیلیق دستمزدین باغبان آلدی
🍁🍁🍁🍁🍁
