حضرت رقیّه (س)
من بابامدان آیریلاندا گوزیاشیم دونوبدی قانه
ظلمیله منی آییردی شمر الینده تازیانه
ایندیده یوزومده عمّه وار او ظلمیدن نشانه
هانسی قیز دوزر منیم تک بیر بئله جفایه عمّه
کربلاده ظلم الیله عیش گلشنیم پوزولدی
دمبدم بو خسته گویلوم غصّه و ملاله دولدی
افّ اولا بو روزگاره مسکنیم خرابه اولدی
آغلارام ئولونجه نالم اوج ائدر سمایه عمّه
آج سوسوز خرابه یرده آتش غمیله یانّام
بولسم اکبریم که ساقدی هر مصیبته دایانّام
گلسه قارداشیم سفردن باشینه دوروب دولانّام
اوزگه بیر علاقه منده وار او مه لقایه عمّه
قارداشیمندان آیریلاندا یوز وئروب بلا و محنت
بولمرم نه وار باشیندا گلمدی او ماه طلعت
دمبدم بو شامون اهلی ایلوری منه شماتت
وار یری گلنده اکبر ایلسم گلایه عمّه
من او بلبلم چمندن دوشموشم بیله کناره
توش ائدوب منی زمانه ظلم الیله جور خاره
یوخدی قارداشیم یانیمدا کیم قویار منی مزاره
کیم منه وئرر تسلّی کیم گلر عزایه عمّه
من همان بالا دگولدوم قیدیمه هامی قالاردی
نازیله منی قوجاقه عمّه جان عموم قالاردی
قارداشیم قیزی دئیردی بوینوما قولون سالاردی
خوش دلیله دیندیرردی اوندا باخ وفایه عمّه
یادیمه دوشر او گونلر شاد اولوب نه نوع گولّم
گورمرم ائله بیر عزّت بو خرابه یرده بولّم
قارداشیم عموم گلینجه قالمارام من عمّه ئولّم
چاره سیز گرک دوزم من ظلم اشقیایه عمّه
هانسی بیر قیزون الیندن من کیمی گئدوب جلالی
غصّه جسمینی اریتدی اولدی قلبدن یارالی
سنده یاز مزاریم اوسته ئولدی اکبرین مارالی
عالم اهلینه بولوندور دوزدوم هر قضایه عمّه
بیرده یاز بو قیز ئولنده دائماً یولا باخاردی
ماسوانی بو یتیمون آهی یاندیریب یاخاردی
دلدن اصغر آدی گوزدن اشک حسرتی آخاردی
شرح اولونسا انتظاری یتمز انتهایه عمّه
