حضرت رقیه س
بیر اوچ یاشیندا قیزام بوخدی طاقتیم درده
ئولوم تری دوزولوب آلنیما... نمایاندی
بو گون بیلوردوم ئوزوم ، آیری گونله فرق ائیلور
یازیم دییوردی منه ، درده شام پایاندی
بوگون گئیوب کئچینن وورمادی منه طعنه
گلن گئدن دئمه دی بو یتیم ، نالاندی
دونن دعا ائله دیم بار الهی رحم ائیله
بو بختی قاره قیزا ، خسته دی پریشاندی
یورولموشام او قدر روحیم اینجییوب یولدا
یامان گونومدی، بابام گلسه ، ئولمگ آساندی
گرگ کی شکر ائلیم ساحت خداونده
ائشیتدی ناله لری ، حق رحیم و رحماندی
خداده ایسته مه دی قلبیده قالا آرزم
یئتیردی ئوز بابامی ، وصل جان و جاناندی
بو گون بیلوردوم اولار روحیمین قوشی آزاد
بی بیمده بیلمیشیدی... گوردوم اشکی باراندی
دیدیم بی بی، سنی چوخ گورمه سین منه الله
دئدی نه اولسا قیزیم تحت امر رحماندی
دئدیم چوخ اولدی سنه زحمتیم.. حلال ائیله
دئدی گرگ دی دوئزم ابتلایه ... پیماندی
دئدیم ندن توکولور بو قدر گوزون یاشی
دئدی توکولسه اگر یارون اوسته.. درماندی
دئدیم بی بی گئجه لر صبحه جن یوخوم گلمور
اوپوپ دئدی دوزه لر .. جان بالا آجونداندی
دئدی قرا گوزووی یوم.. بیراز یاتوب دینجل
دئدیم نفس سیخیلور، بو خرابه زنداندی
دئدی اوتورما.. دو گز.. چکمه آهی آه اوستن
دیدیم باتوبدی تیکانلار ایاقیمه.. قاندی
دئدی قرا گوزووی قوی اوپوم ، دئدیم اوپمه
بویوردی ناز ائدوسن ؟ یوخ دئدیم پریشاندی
دئدی نیوندی بالا؟ گوزلریم دئدیم آغرور
دگنده سیلی منه عمه ، گوزلریم یاندی
حاج علیرضا امانی مجد اردبیلی
