نوحه ای زیبا دراحوالات حضرت ابوالفضل ع
مست رخ جانانه دی آگاه اولان عاشق
مست اولماسا کیم عاشق هشیار اولا بیلمز
قوشلار پر آچوب باغه گلر گوللره خاطر
پس دانه گزن لایق گلزار اولا بیلمز
گمراه اولا کیم اوّلِ قاموس وفاده
پایان بو فرهنگیده بیدار اولا بیلمز
لیلانون اگر وصلی اولا، مقصد مجنون
کَج گئتدی یولون لیلیه دلدار اولا بیلمز
عاشق خم معشوقیدن اَل چکسه خطادی
زار اولماقی مقبولیدی بیزار اولا بیلمز
استادیدی عبّاس ئوزی فرهنگ وفاده
استاد وفا همدم اشرار اولا بیلمز
بیزار اولا بیلمزدی وفا ماهی، گونونن
استاد وفاداری ، خطاکار اولا بیلمز
امّا اِئله زاریدی امان نامه سوزونّن
بوگون کیمی هچ گون بویوروب تار اولا بیلمز
اخیامه باخاندا اوتانیدی باجی سنّان
شرمیم دِئدی بو باره ده مقدار اولا بیلمز
آواره قالوب نِینیه یادّان چخا بوسوز؟
مولایه دِئدی شِکوَه سزاوار اولا بیلمز
بو مسئله نی بیلدی حسین ایله دی اقدام
خلق ایله دی بیربزمی کی تکرار اولا بیلمز
ئوز خیمه سینه زینبب علیانی چاغوردی
هچ کیم باجی تک قارداشا غمخوار اولا بیلمز
خلوتده خصوصی باجی قارداش دانشولاّر
بیگانه بلی واقفِ اسرارِ اولا بیلمز
زینب دئِدی اهل حرم آشفته دی قارداش
تارجِ خزانیله بو گلزار اولا بیلمز
عبّاسه امان نامه گلنّن ، هامی قورخور
وحشتده حریمِ شهِ اَبرار اولا بیلمز
دلخسته ربابون نگراندی نَدی چاره؟
اهل حرمون گوزلری خونبار اولا بیلمز
احضار اِئله عبّاسی ائدک خیمه ده صحبت
راضی بو مصیباته او سردار اولا بیلمز
الآن هامی ایستور بیله نینور او دلاور
تصمیمی عیان ، ائتمه سه گفتار اولا بیلمز
***
قارداش ، باجونون سوزلرینی ائیله دی تایید
حجّت اگر اتمام اولا دشوار اولا بیلمز
***
عبّاسی اَوَل ایله دیلر خیمیه دعوت
هچ عشقیده بو قصدیله احضار اولا بیلمز
داخل اولوب اَل سینه ده سرهنگ وفادار
بیر حالدا سلام ایله دی اقرار اولا بیلمز
نه زینبه بیر آن باخا بیلدی نه حسینه
شرمیله بلی، شرح اولا، افکار، اولا بیلمز
هچ کیم آچا بیلموردی سوزی، قالدلا ساکت
صبر اهلی اگر صبر اِئده دشوار اولا بیلمز
مشکلدی ولی بیر نفرون صبری آز اولسا
گوردی بئله بیر حالدا ، علمدار، اولا بیلمز
عرض اِئتدی آقا نوکریوُن قلبی دارخدی
قلبیم آخی بو باره ده آزار اولا بیلمز؟
شُمر ایله دی جُرمی منی توبیخ ائلیورسن؟
جُرم ائتمیه نه بو آجی رفتار اولا بیلمز
آخر نه دلیلیله دانشدورموسان الآن؟
سنده بئله بیر حال و بو رخسار اولا بیلمز
***
درک ائتدی حسین قارداشی مشگلده قالوبدی
درد اهلیدی درمانه گرفتار اولا بیلمز
فرمایش ائدوب سنله نچه جمله سوزوم وار
بو درد دِله ، ئوزگه خبر دار اولا بیلمز
شرم اِیلِیوسَن بیلّم امان نامه سوزونّن
بو حُکمِ مَشیّتدی سنه عار اولا بیلمز
یتمیش ایکی سرگشته منه واردی هوادار
بونّان داها پیمانیده اصرار اولا بیلمز
ئوز نسبتینه هر بیرینون قیمتی واردی
هچ تنگه دوشن شاهه بو انصار اولا بیلمز
امّا سنه قیزلاریم آچوب آیری حسابی
افسوس اولا احساسی پدیدار اولا بیلمز
قارداشلارُوُن عظم ائِله دوت اَ للرین اَ لده
قل چاره سحر یول سیزه هموار اولا بیلمز
ترک ایله بو پوزگون سپهی چکمه خجالت
هر چند کی تصمیمیده اجبار اولا بیلمز
گئتسونده خیال اِیلَمَرم بوشلادی گِتدی
یولاّردا سنون زحمتون انکار اولا بیلمز
قوی اصغریمه حرمله اوخ وُرسادا وُرسون
بو سود امره کیمسه مددکار اولا بیلمز
گتمک نظرون اولسا اولاخ قول بویون الآن
ایشدی داها سنّن منه دیدار اولا بیلمز
***
تأ ثیر اِئله دی روح ابالفضله بو سوزلر
غیرت دِئدی آیا ئورگون زار اولا بیلمز؟
باشین اشاقا سالدی خطاب اِئتدی حسینه
یا سیّدی سیزدن بئله گفتار اولا بیلمز
عباسون ئوزون ساتماز امان نامیه مولا
سقّا طُلقی زادیه همکار اولا بیلمز
بو نوکری آیلاردی جلودار ائلیوبسن
الآن نه اولوب قافله سالار اولا بیلمز؟
زینب کنیزی اوغلون اِئدوب نوکر حسینه
پیمان ائلیوب عهدیده انکار اولا بیلمز
اولّم ننه مین قویمارام امّا سنا عهدی
وجداندا ، شرف اولماسا ، بیدار، اولا بیلمز
دئیسن منه بو دشتیده شش ماهه نی قوی گئت؟
گِئتسم آدم عباس وفادار اولا بیلمز
فکر ایله گِئدم من ، اِئلیه بَدرقه قیزلار
مردانه لیگه دهریده اقرار اولا بیلمز
قیزلار منه مشکلد ه پناهنده اولیلار
اغیاره پناهنده علمدار اولا بیلمز
عباس آقاسن جنگیده تک بوشلاسا گِدسه
پورِ خلفِ حیدرِ کرّار اولا بیلمز
بیر عدّه سوسوز عترتی قورخوتما آماندی
هر کس بئله توفیقه خبردار اولا بیلمز
زهرایه قَسَم قالماغمون منّتی یوخدی
گوز گئتمه سه قول گئتمه سه ایثار اولا بیلمز
قوما منی ، سندرما علمداری بو چولده
هچ بیر قاپی عبّاسه بو دربار اولا بیلمز
قوسوندا گئدیب خیمه کنارینده دایانّام
قِبلونّن اوزاق کعبیه زوّ ار اولا بیلمز
قارداشلغمز قالسون اوزاق ، نوکرُوَم من
نوکر نئجه مولایه مددکار اولا بیلمز؟
***
ترک ائتدی اَوَل خیمیه ی سلطانی ابالفضل
خشمیله گِئدور کیمسه نگهدار اولا بیلمز
حسرتله یوزون دوتدی نجف ملکینه ساری
بختیم دئدی منلن نجه گور یار اولا بیلمز
سسلندی بابا گور نه گونه قالدی اباالفضل
سر لشگره باخ عازم پیکار اولا بیلمز
سنماخ نه چتیندی بابا جان سندی غروریم
اوغلون بو فنا دهریده سربار اولا بیلمز
قودی قاپوسونّان منی بو چولده حسینون
سرهنگی ، سپاهینده ، جلودار اولا بیلمز
زینب ائشیدوب ناله لری چخدی خیَمنَن
گوردی ائله بیر صحنه کی تکرار اولا بیلمز
عباسی گوروبدور توکور ئوز باشینه تپراق
عالمده دئیور من کیمی ناچار اولا بیلمز
***
قالخوزدی ایکی الّرینی بوینونا سالدی
فرمایش ائدوب گتمگون اجبار اولا بیلمز
زینب بو جوشان غیرت سرشاروه قربان
هچ کیمسه فدا اولماقا ، وادار اولا بیمز
بو چولده بیلوردوم بیزی آتمازسان ابالفضل
سن تک بیزه سرهنگ وفادار اولا بیلمز
***
زهرای سه ساله دایانوب گوشه ده گریان
قورخیلا باخان گوز نجه خونبار اولا بیلمز
باشینّن اَوَل معجرینی آچدی رقیه
هرمشتری بو جنسه خریدار اولا بیلمز
سرعتله گلوب دوردی ابالفضله مقابل
تاب اِئتمَگه بو نسگله انظار اولا بیلمز
آتدی یئره ئوز معجرینی ایلدی اظهار
بو درده رضا ، ثابت و سیّار اولا بیلمز
بیز هچ سود امر اصغره خاطر عمو گتمه
لب تشنه، عمو،طفل لبن خوار اولا بیلمز
