شهادت حضرت زهرا س
سن ایوین بویوک قیزیسان گرک آناوین یرین آلاسان بالا
سنی گوزلریم کیمی ایسترم اورگیم سوین بالاسان بالا
بویوموش یازون که اوشاق چاقی باشوا قرا سالاسان بالا
آناسیز فقط بُلر آیریلیق نه یاماندی زینبیم آغلاما
ایله گون سایاردیم اُلن زمان باشیم اوسته آغلاماقون گوروم
گوزوم آختاراردی بو ساعتی بیله سینه داغلاماقون گوروم
دوروب ایله سینمی خشکبند بالا یاره باغلاماقون گوروم
یارا باغلاماق یاراشور سنه بو عیاندی زینبیم آغلاما
سن عزیزیم عالم عشقیده منیم اوز یریمده نشانه سن
حسنیله همدم و همقدم غم ایوینده صاحب خانه سن
آنا عزّتی آتا زینتی دُر بی دلیل و یگانه سن
سنه جان دیدیم که محبّتون منه جاندی زینبیم آغلاما
اوزیوی یوروب منی پوزما چوخ گوروسن ایاقه دورانمورام
باشیم اوسته دورما اوتور یره اُلورم دوروب اوتورانمورام
آناوی بغیشله که زلفیوه بیر الیمله شانه وورانمورام
قاپوموز یاناندا الیم قولوم یارالاندی زینبیم آغلاما
دیمیشم علی آتاوا اوزی قازا قبریمی علن اولمیه
گئجه وقتی دفن ایده نعشیمی بو قضیّه نی بُلن اولمیه
غربا کیمی منی اوخشیون ایوه قورخورام گَلن اولمیه
که سحر خدا اوزی ناظر جریاندی زینبیم آغلاما
کمک ایله سن دوروب اشکیله اورک آتشین خنک ایلرم
عوضینده من اوزیمی سنه هامی غمده مشترک ایلرم
توکولنده خیمه لره قوشون گَلرم سنه کمک ایلرم
هله صبر ایله که یامان گونون او زماندی زینبیم آغلاما
من او پیرهن که نوائیلن توخیوب سنه دیمیشم سوزون
گوز ایوینده ساخلا او کوینگی سفره گیدنده آپار اوزون
اونی سندن ایسته سه قارداشون بوغازیندان اُپ ولی یوم گوزون
آناسیندان اوغلونا یادگار او نشاندی زینبیم آغلاما
خبر آلما علّت فوتیمی آنا قلبینه سوزون اوخ ساچار
سنه چوخ سوزی آچا بُلمرم ولی کربلاده فلک آچار
او زمان که خیمه لروز یانار سویولوب رقیّه چوله قاچار
گَلرم سنه دیرم قاپوم نیه یاندی زینبیم آغلاما
منه آغلینجا حسینه باخ غم کربلاسینی یاده سال
کسیلنده قارداشیوین باشی باشیمون بلاسینی یاده سال
سینه سیندن اوخلاری هی چکوب سینمون یاراسینی یاده سال
قانی گَلسه باشه یاخوب دینه بو او قاندی زینبیم آغلاما
