حضرت فاطمه زهرا س
ولایت عشقی دولدوروب بو تار و پود جانیمی
بو نیّتیله گون چخار که اوپسون آستانیمی
قانیله میخ در یازوب علملره نشانیمی
جوان لیقیمدا حیف اولا که قامتی هلالیم
🍁🍁🍁🍁🍁🍁🍁🍁
همای باغ جنّتم بهشتیده اوچام گرک
حسین حسن اَلین دوتوب بو شهریدن قاچام گرک
شکسته دل عم اوغلومون بو قولّارین آچام گرک
که منده حلّ مشکله عم اوغلومون مثالیم
🍁🍁🍁🍁🍁🍁🍁
او کس که یاعلی دیوب جهاد ایده سعید اولوب
شه ولا یولون گیدن همیشه روسفید اولوب
قاپوم یاناندا ظلمیله منیم بالام شهید اولوب
شهید آناسیم اوزوم دیمون که دست خالیم
🍁🍁🍁🍁🍁🍁🍁
علی قضاوت ایتمه سه خلل یتر عدالته
بیر عدّه نصب ایدر اوزین بو کُرسی خلافته
محسنیمون شکایتین ساخلاموشام قیامته
ظلمه باش اگمینلرین حشریده عرض حالیم
🍁🍁🍁🍁🍁🍁🍁
آتام یرینده اگلشه یوخ اوزگنون لیاقتی
رسالتی تانیتدوروب عم اوغلومون امامتی
عبادته صفا ویرر فقط علی ولایتی
بیله امام و رهبرین جهاندا من عیالیم
🍁🍁🍁🍁🍁🍁🍁
قسم رسول اکرمه وفا یولین ایتورمرم
بو دامن ولایتی اُلونجه من اوتورمرم
قولوم سینا، بالام اُله، علیدن اَل گوتورمرم
اوزوم اگرچه ناخوشام بو گون باشی بلالیم
🍁🍁🍁🍁🍁🍁🍁
ریاست اوسته تولانوب مسیر حقده قالمادوز
قیامتیله قبر ایوین بو گون خیاله سالمادوز
ندن سلام ویرمه دوز، علی سلامین آلمادوز
بو باره ده خدا بُلور اورک یانور نوالیم
🍁🍁🍁🍁🍁🍁
مخالف ولایته قوشولمارام قاریشمارام
علی کوسنلریله من کوسولموشم باریشمارام
جهاندا بی حجابیله اُلم قالام دانیشمارام
ایویم سرای وحی دور حمیده ام حیالیم
🍁🍁🍁🍁🍁🍁🍁
حقیقتی بوراخمیون جحیم اوتوندا یانمیون
سِلاحه سیز دایانمیون، خلیفه دن اوتانمیون
فدک منیمدی دانمیون، ثانی سوزین اینانمیون
من عزّت امامتم، رسالتین مدالیم
🍁🍁🍁🍁🍁🍁🍁
بو مطلعی ویروبدی بیر صفالی نوحه خوان منه
ولی کیمون کلامیدی تانیش دگل یازان منه
هزار شکر لطف ایدور همیشه دوستان منه
بو یار و یولداش اولماسا حبیب لا اُبالیم
🍁🍁🍁🍁🍁🍁
