حضرت زهرا س

گل جان ویرورم موسم هجراندور عم اوغلی 

آثار اجل منده نمایاندور عم اوغلی

______________◾◼◾__________

مدتدی دیردیم ئولوم اولسیدی نصیبیم 

آسوده اولاردوم من غمدیده حبیبیم

آخرده دوا ایلدی بو درده طبیبیم 

بو صون نفسیم ایسته دیقیم آندور عم اوغلی

______________◾◼◾__________

چوخداندی چکردیم بیله بیر ساعته حسرت

اوز محضرینه یاریم ایدیدی منی دعوت

چوخ شکر ایدرم اولدی مرامیم منه قسمت

منظور دلیم محضر جاناندور عم اوغلی

______________◾◼◾__________

جان اوسته ایدوب محنت هجران منی غمگین

ای ناطق قرآن اوزی سر مطلع طاسین 

اگلش باشیم اوسته اوخی بیر سوره یاسین

تسهیل ممات آیه قرآندور عم اوغلی

______________◾◼◾__________

چکدیم هانی اندوه و غم دار فنانی 

گوز یاشی کیمی قلبیمون آخدی یوزه قانی

آگهسن اوزون سالدی ایاقدان منی ثانی

ثانی ستمیندن اورگیم قاندور عم اوغلی

______________◾◼◾__________

قویدی گل طاهانی عدو خار آراسندا 

یخدی منی ثانی یره اشرار آراسندا 

سندی قولوم آخر در و دیوار آراسندا 

بو درد مگر قابل درماندور عم اوغلی؟

______________◾◼◾__________

یاندوردی او گون قاپومی قوم بدافعال 

بیر سقط جنین ایتدیم اوزیمدن قاباق ارسال

تا مندن آپارسون باباما محسنیم احوال

کشف ایلسون امتده نه طغیاندور عم اوغلی

______________◾◼◾__________

دعوت منی ایتمشدی بابام باغ جنانه 

ثانی ستمی ئولماقیما اولدی بهانه

بیر صورت نیلی ولی ایستردی نشانه

سوقات سفر عادت مهمان دور عم اوغلی

______________◾◼◾__________

شاهد دوتارام حشرده خلاق جلیلی

من ئولمدیم ئولدوردی منی ثانی، دلیلی

پهلوی شکسته، گویرن قول، رخ نیلی

زهرانی شهید ایتماقا عنواندور عم اوغلی

______________◾◼◾__________

یاندی اورگیم، ملکیمی دشمنلریم آلدی

آج قالدی حسین و حسنیم سولدی سارالدی

آخر منی بیر حاله فدک قضیه سی سالدی

جنتده بابام ایمدیده نالاندور عم اوغلی

______________◾◼◾__________

گلسون دیمورم خویش و ائل، آخر نفسمدی 

اطفالیمی گورماق بو گون عمده هوسیمدی 

بیر اوغلوم حسین گلسه ئولن دمده بسیمدی 

جسمیمده حسینیم بولوسن جاندور عم اوغلی

______________◾◼◾__________

من گتلمیم فکرت اطفالی سن ایله

قویما گله لر شیونه رفع محن ایله

مخفی منه ویر غسل گجیله کفن ایله

بو سوز منه مشکل، سنه آساندور عم اوغلی

______________◾◼◾__________

آز قالدی کسه روحیم علاقه بدنیمدن 

قطع ایلمه علقه سن حسین و حسندن

شیون اوجالار خلدده افسرده تنیمدن 

گورسم بالامین گوزلری گریاندور عم اوغلی

______________◾◼◾__________

لازمدی ایدم من سنه نچه وصیت

هر قدر الوندن گله قیل زینبه رافت

چوخ قلبی سنقدور اونا چوخ ایله محبت

من تک اودا مظلومه دوراندور عم اوغلی

______________◾◼◾__________

باشدا بو قیزون وار نه بلاسی بولورم من

هر غمده منه نایبه دور، مونسی شیون

گویا گورورم کرب و بلاده بونا دشمن

ایلوله او که ظلم فراواندور عم اوغلی

______________◾◼◾__________

قولارینی باغلالا دوزر، غصه دن ئولمز 

ارثیه دی مندن اونا ناله، یوزی گلمز 

من بولم اونون حالینی بیر اوزگه سی بولمز

اوز حالیم اونون حالینه میزاندور عم اوغلی

______________◾◼◾__________

بیر کس بونا همدرد و شریک محن اولماز

عباس و علی اکبر گل پیرهن اولماز

قارداش چاغوراندا سسینه سس ویرن اولماز 

همناله سی بیر جمع پریشاندور عم اوغلی

______________◾◼◾__________

ای جده مظلومه سنی زینب کبری

(سعدی زمان) نطقینه لطف ائت اولا گویا

عرض ایله عمون اوغلنا، ای عصمت علیا

جنتده حسینی منه مهماندور عم اوغلی

______________◾◼◾__________

مستخدم درباریویله بش نفر احرار

بو مطلبین انشاسینه ایتدی منی وادار

قیل اوغلون حسینه اولاری هم منی زوار

قبرینده دیاخ موسم هجراندور عم اوغلی

 ____________◾◼⬛____________