حضرت زهرا س

آچ گوزون ای اون بیر اولدوز آسمانی فاطمه

گون باشون اوستونده دور عصرین زمانی فاطمه

______________🔹🔷🔹__________

ای کلام الله مُنزَلده آدی طور سینین

طور تک سنده هویدا طلعت جان آفرین

گور باشون اوسته کلیمون دلده اَرنی دلغمین

ویر جواب اَُنظُری یا لَنْ تَرانی فاطمه

______________🔹🔷🔹__________

ای رسالت چرخینه بیر نیّر اعظم اویان

یادگار حضرت پیغمبر خاتم اویان

یاتما ای تاویل کَرَّمنا بنی آدم اویان

نوری ای دل شاد ایدن افلاکیانی فاطمه

______________🔹🔷🔹__________

ای خواتین بهشته خدمتی فرض و ضرور

ای طفیلی خلق اولان اولادینه حور و قصور

نوری نور ذات باری معنی الله دور

احمد ثانی و توحیدین بیانی فاطمه

______________🔹🔷🔹__________

سَن گونون بو وقتی یاتمازدون نه راحت یاتموسان

موقع راز و نیازی خواب نازه ساتموسان

گوزلرون قربانی گوزدن ماسوانی آتموسان

آلموسان قلبیمده کی تاب و توانی فاطمه

______________🔹🔷🔹__________

سندن اوزگه یوخ انیس درد دل بیر کس منه

سنسیز عالمده اولار کیم مونس غم بس منه

ویرموسن علّت ندور آرام جانیم سَس منه

آشنا سالماز گوزیندن آشنانی فاطمه

______________🔹🔷🔹__________

موسم راز و نیازوندور نَدور بو خواب ناز

گونده کی فکریله زینب فرش ایدوبدور جانماز

آیریلیق هنگامیدور، دور ایلیاخ راز و نیاز

بَسدور آغلاتما منِ بی خانمانی فاطمه

______________🔹🔷🔹__________

آز قالور ترک ایتماقا بو بی وفا دنیانی سَن

اولماقا خُلد برینده مصطفی مهمانی سَن

ایمدی که ترک ایلوسن بو خانه سی ویرانی سَن

ایلین ساعت مکان باغ جِنانی فاطمه

______________🔹🔷🔹__________

محضر پیغمبره عرض ایت عم اوغلوندان سلام

جور و ظلم امّت بی شرمی کشف ایله تمام

دی عم اوغلون قولّاری باغلاندی ای فَخرُ الْاَنام

مسجده چکدی یوزی اوستونده ثانی، فاطمه

______________🔹🔷🔹__________

وار ولی بیر خواهشیم سندن ایا بنت رسول

حقّیمه ویرّم قسم بو خواهشی ایله قبول

تازیانه سُویلمه ووردی منه خصم جهول

ایتمه ظاهر، ایله بیر سرّ نهانی فاطمه

______________🔹🔷🔹__________

گر دیسَن مسجدده دی زلفون اَلیوه آلماقون

بیر اوزون مدّت باشا بیر کهنه معجر سالماقون

سویلمه واضح آتان پیغمبره آج قالماقون

ایتمه شرمنده علیَّ الْمرتضانی فاطمه

______________🔹🔷🔹__________

اختیارون وار نقدری ظلم اولوب ایتسَن عیان

ایلمه امّا فدک اوضاعینی اصلا بیان

صورَتونده جدّوه سیلی یرین ویرمه نشان

تاب ایدَنمز گورسه بو نیلی نشانی فاطمه

______________🔹🔷🔹__________

گوزلرین آچدی بو سوزده باغ پیغمبر گُلی

باشی اوسته گوردی گوز یاشلی دوروبدور بلبلی

سویلدی واردور عم اوغلی قلبیمون بیر مشکلی

اذن ویر عرض ایلسون رحلت زمانی فاطمه

______________🔹🔷🔹__________

کسدی مقراض اجل دلدن تمام آمالیمی

کیم اوزوم تک نازیله ساخلار منیم اطفالیمی

آغلاسا کلثومیله زینب پوزار احوالیمی

دیده سی گریان گورَنمز مجتبانی فاطمه

______________🔹🔷🔹__________

لطفون اولسون کربلا مظلومینه هر آن سنون

هم منیم روحیمدور او، هم ای شه دوران سنون

بیر دقیقه گوز گوتورمه، جان حسینون جان سنون

ایمدیدن ایلوب مجسّم کربلانی فاطمه

______________🔹🔷🔹__________

دوزمرم گر بیر دقیقه بو حسین غمگین اولا

آغلیا شهلا گوزی، گل صورتی گل تک سولا

وای او گوندن وای او ساعتدن گوزینه قان دولا

گورسه قان آغلار ایله بیر ماجرانی فاطمه

______________🔹🔷🔹__________

بیله عرض ایلور «حسینی» ای گل باغ هدی

کاش یازهرا گورِیدون کربلاده اشقیا

بو حسینه ووردولار نه نوعیله دورت مین یارا

چشمَه چشمَه پیکریندن آخدی قانی فاطمه

______________🔹🔷🔹__________

اوندا که اوغلون حسین دوشموشدی قانلی مقتله

قتلینه اولموشدی حاضر شمر و خولی حرمله

سنده زینب تک آلِیدون جدّه جان زلفون اَله

ایلیِیدون سر به سر ویران جهانی فاطمه

______________🔹🔷🔹__________

ای اولان محبوبۀحق، دختر خَیرُ الْاَنام

وی ایکی عیسایه مریم، وی ایکی یحیایه مام

آند ویرّم اوغلووا ایسته خدای لایَنام

ایتمَسون بیمار «سعدیِّ زمانی» فاطمه

 _________________________________