قبر شش گوشه...
بیری جواندی قبول ایلیوب ایاق طرفی
بیریسی طفلیدور آغلور آلوبدور آغوشه
آنا یرینه اوزی اصغره دیور لای لای
که بلکه ساکت اولا بیر زمان گیده هوشه
گورور اورک گوزی گویا او حال جانسوزی
حسینون اللّری اوستونده باش آخوب دوشه
ایله یانوب عطشه خشک اولوب گیدوب رَمَقی
نجه که شاخۀ سنبلده خشک اولار خوشه
سهیل عارضی خورشیده زینت آغوشه
شَهه ستارۀ رخسار، زیب سردوشه
باشی آخوب بدنون حسّی یوخ دوشوب دلدن
صدائیله یتشوب بیر خدنگ او خاموشه
گَتوردی اصغره سو آبدار پیکانی
سَپلدی قان یوزینه ویردی هوش او مدهوشه
دگنده اوخ گوزینی آچدی گُولدی یعنی بابا
بو نیش مُهلکی حقّونده ویرمرم نوشه
دونوب قانا جگری شهریار خونجگرین
گورنده قانینه آغشته دور جگر گوشه
او قانی اوجنا دوتدی سپهره سَپدی دیدی
بو نقش خون یاراشار خوش سپهر منقوشه
بو قانه غوطه ورار آفتاب شام و سحر
شعاع سرخ سالار سطح خاک مفروشه
خدا قیامت اولونجا بو قانی ساخلار اوزی
بو قاندی الده حسینه قیامته توشه
بو سوزده شرکت ایدوب «ذهنی» «ناظمون» سوزینه
آلور قراریمی الدن او قبر شش گوشه
