حضرت رقیه س
ووردی هامی باشینا رقیه دیه دیه
دوشدی رقیه وای سسی سامین دیارینه
زینب دیدی کناره گیدون دیندیریم ئوزوم
شاید ویره جواب بو محنت دچارینه
یئردن گوتوردی باشینی آهسته آغلادی
گوردی باتوب جمالی خرابه غبارینه
دوتقونسسیله سسلدی عمن ئوله اویان
ویرمز مگر جواب قیزیم یار یارینه
ناز ایلوسن منه سسیمی یا ایشیدموسن
عادتدی ناز ایدر گل همیشه هزارینه
نعشین آلوب قوجاقه بیر آزقاچدی صاق صولا
مرهم تاپانمادی دل ناپایدارینه
ئولدی دیدی خرابه ده گون گورمین بالام
سالدی فلک مدارینی غربت مدارینه
قالسا جنازه یئرده حرملرهلاک اولار
تیز دفن ایداخ سالاق یولا بزم نگارینه
غساله حاضر ایتدیله ویرسئنله غسلونی
غساله نین قاریشدی گونی لیل تارینه
بیر خیردا قیز جنازهسی گوردی خمیده قد
آویزه گلدی صدمه یتوب شاخسارینه
باشون سالوب اشاقه ئورکلندی آغلادی
آگه اولوب حکایت اندوه یارینه
بیر گوز دولوسی زینبه باخدی دیدی خانم
سن کوینگین چیخات ایله آماده کارینه
غسلون نجه قورتاردیلا واضح دینمرم
یازسون قویانمارام قلمون اختیارینه
بعضی یارا واریدی گرگ دگمیدی سو
اولدی او سو مقدمه قان چشمه سارینه
زینب کفن دالیجا دولاندی تاپانمادی
دوتدی قرا کفنی رخ شرمسارینه
قیلدی امام ساجد او طفلون نمازینی
ایتدی دعا او کوی وفا رهسپارینه
زینب دیدی وصیت ایدیب تاپشوروب منه
قبرون ئوزوم قازام یتورم اعتبارینه
هرسمتینی دولاندی خرابه حصارینون
ازبس نظر سالوبدی یمین و یسارینه
جز خشت و پاره دن صورا بیر زاد تاپانمادی
شرم ایلدی بیرینی چاغیرسین کنارینه
قبرون نئی له قازدی نجه قازدی بولمورم
مین یول ئولوب دیریلدی یتوردی مزارینه
غم چکمه عندلیب دوام ایت بو درگهین
هرزاد ویرله نوکر امیدوارینه
من کلام :حاج عزیز ممی پور
