قتلگاه
ای کاش باجوندا یاراسندن چوخ اولیدی
یا بوندان ازل عالم امکان یوخ اولیدی
نه حرمله قارداش، نه کمان، نه اوخ اولیدی
باشسیز بدنونده آنام اوغلی یارا چوخدی
تا قلبیوه بو اوخ بو بیاباندا توخوندی
ذبح آیه سی حقّونده فلک لرده اوخوندی
بیر بوسه یری زینبه جسمونده یوخوندی
باشسیز بدنونده آنام اوغلی یارا چوخدی
اسلامیده سیندیردی بو اوخ رکن رکینی
زلفیم کیمی پوزدی هامی شیرازه ی دینی
بو اوخ دگی خنجردی ایدوب قطع وتینی
باشسیز بدنونده آنام اوغلی یارا چوخدی
گوردی که سوسوز قلبون اوغول داغی ایدوب قان
هیچ نحویله بو قلبه مداوایه یوخ امکان
فکر ایتدی بوشاتسون اودی نشترلدی پیکان
باشسیز بدنونده آنام اوغلی یارا چوخدی
هر بیر یارادان قلبینه بیر غصّه چوکوبدی
بو اوخ یاراسی کُل باشیمه لیک توکوبدی
قلبون آنام اوغلی بو نجه اوخدی سوکوبدی
باشسیز بدنونده آنام اوغلی یارا چوخدی
بو اوخ که سنون قانه دونن قلبیوی دَلدی
بی کس باجوین عزّتی قارداش باشا گَلدی
بو عرق حیاتی قیران اوخ پیک اجلدی
باشسیز بدنونده آنام اوغلی یارا چوخدی
بو اوخ آتانین کاش اَلی دوشسون بیلگیندن
هانسی اورگین قانی آخوبدور کوره گیندن
بو اوخ وورولِیدی باجوین کاش اوره گیندن
باشسیز بدنونده آنام اوغلی یارا چوخدی
صبر ایلیوم آیا نجه توکموم یوزه قان یاش
جسمون داغیلوب قطعه به قطعه یره قارداش
بوندان ازل عالمده اُلیدی باجون ای کاش
باشسیز بدنونده آنام اوغلی یارا چوخدی
سن اُلماقا چوخ طالبیدی گر بو جماعت
بیجادی ووروبلار سنه بیر بیله جراحت
بو اوخ یاراسی قتلیوه ایلردی کفایت
باشسیز بدنونده آنام اوغلی یارا چوخدی
بیر درده «حسینی» دوشوب ای خسرو والا
تشخیص و مداواسینه عاجزدی اطبّا
لطف ایله شِفا ویر اولا بو مطلبه گویا
باشسیز بدنونده آنام اوغلی یاراچوخدی
