امام رضا ع
هر کیمسه نین که دردینه اولماز معالجه
فکر علاج ایدر که یتیشسون نتایجه
یوز دوندرر او باب نجات و حوائجه
سندن آلار نه حاجتی وار یا اباالحسن
وار سنده بدویدن صفت خالق کریم
اجرا ایدر اوامریوی جنّت و نعیم
ایسته گلوم او مُلکیده منده اولوم مقیم
دلده وصال نیّتی وار یا اباالحسن
یوخ یر یوزونده بارگهون مثلی بیر بساط
هر بیر دله گوزل حرمون آرتورار نشاط
روحون او یرده کسماقا بو تندن ارتباط
حقّه قسم رضایتی وار یا اباالحسن
غبطه او بارگاهه ایدر چرخ آبنوس
بیر مهد عشق اولوب سنیله خاک پاک طوس
وورّام نصیبیم اولسا او گویچک ضریحه بوس
اُپدوقجا روحه لذّتی وار یا اباالحسن
قربان اولوم جلالیوه فرخنده جاهیوه
ایله نظر، فدا نظر گاه گاهیوه
دردیم دواسی بسته دی بیرجه نگاهیوه
بو عرضیمون حقیقتی وار یا اباالحسن
چوخلار چکلّه حسرتینی عزّ و جاهیوین
بخصوص آستانه ی دولت پناهیوین
چرخ برینه غبطه اولان بارگاهیوین
عرش خدایه رفعتی واریا اباالحسن
عمروم بهشته ناز ایلین صحنیوه فدا
گلدسته لر آچان گُل اولوب آرتیروب صفا
تشبیه ایدم جنانه سوزومده اولار خطا
هاردان اونا شباهتی وار یا اباالحسن
اولسون قسم جلالتیوه عزّ و شانیوه
اولسون قسم او خسته و رنجور جانیوه
یوز قویسام آستان مَلَک پاسبانیوه
بیر عمرومه کفایتی وار یا اباالحسن
سن تک هانی حمایت ایدن بی پناهیدن
یوخ ناامید اولان او بیر امّیدگاهیدن
ایستر صله بو رسمیدی درویش شاهیدن
شاهون گدایه رافتی وار یا اباالحسن
حالیم عیاندی چون سنه ای دردیمه طبیب
بنزر اونا که اوز وطنینده اولا غریب
بیرده زیارتون منه اولمور ندن نصیب
نه حکمتی نه علّتی وار یا اباالحسن
یوخلار همیشه رسمیدی مولاسی چاکرین
گوگلون آلوب رعایت ایدر حال مضطرین
عالِمسن ای عوالمه مولا بو نوکرین
آرتوق سنه ارادتی وار یا اباالحسن
افضلدی شاه و منزلتون کائناتیدن
آرتوقدی صبریله دوزومون مُمکناتیدن
خوشحال ایله جزاده منی بیر براتیدن
بو خواهشین ضرورتی واریا اباالحسن
بِل باغلیوبدی اهل جهان تک به تک سیزه
وابسته دور بو هفت زمین نُه فلک سیزه
ای عالمین پناهی کمکسن کمک سیزه
سنده اِلاه قدرتی واریا اباالحسن
ای آسمان مُلکی سماواته افتخار
جودون جهانه فیض ویرر آفتاب وار
نه بخشش و کرامتیوین حدّ و حصری وار
نه مرزی وار نه غایتی یا اباالحسن
واردور اورکده دردی بو دردهدچاریوین
دل حسرتین چکر حرم مشکباریوین
مینلر طبیبه راهنماسن مزاریوین
درد اهلینه طبابتی وار یاحسین
سن ایسته شامل ایلیه حق اور عنایتین
بیر وقفه قسمت ایلیه قبرون زیارتین
سندندی مسلمینه خداوند رحمتین
هم لطفی هم عنایتی وار یااباالحسن
ایتدون ریاض عشق، خراسان دیارینی
گلزار طوسه نوکریوین سال گذارینی
درک ایلمز زیارتیوین افتخارینی
ایلراو که سعادتی وار یا ابا الحسن
ای دردمند و بی کسه روح و دوا آدی
بیمار بی علاجه دوا و شِفا آدی
آرتار گویول صفاسی گلنده رضا آدی
ازبس آدون ملاحتی وار یا ابا الحسن
سنسن خدیو ملک جهان شاه انس و جان
سلطان دین و مامنُ الایمانِ و الاَمان
زخم زبانیدن اورگون باغلیوبدی قان
قلبونده دل جراحتی وار یا ابا الحسن
اودلاندی نار غربته ظلمیله پیکرون
یاندی شرار زهریله قلب مکدّرون
مسموم ایلدی سنی خصم بداخترون
فکر ایتمدی ندامتی وار یا ابا الحسن
دارالشّفا او خطّه ی طوسه گلن دیر
هر دردیمه دوادی مزارون گورن دیر
عشقیله آستانه ی پاکون اُپن دیر
تپراقیوین شرافتی وار یا ابا الحسن
اشرف سایوب خدا نچه اهل ولا یرین
طوس ونجف مدینه وامّ القرا یرین
افضل تمام یردن ایدوب کربلا یرین
بیر یردی افضلیّتی وار یا ابا الحسن
چونکه او یرده جدّون اولوب دینینه فدا
خون حسینیله قاریشوب خاک کربلا
توپراقینی بو علّته حق ایتدی کیمیا
بیر کیمیادی شهرتی وار یا ابا الحسن
صالح دوشوبدی نظمه گوزل طرزیله سخن
ممتازیدور حسینی یازان یا ابا الحسن
حقدن عنایت اولدی دیر بو سوزی گورن
سن تک کیمون جلالتی وار یا ابا الحسن
