قتلگاه
قان لجه سنه غرقم اوزوم فلک نجاتم
نوحی چکن ام ساحله طوفان آراسندا
مین نوح پناهنده منه من سنه یارب
دریایه دونن قانلو بیابان آراسندا
گردابه بو صحرادی سالان کشتی نوحی
داغلار بویی امواج خروشان آراسندا
یاندیم سوسوزومدان سودیدیم تاپمادیم آخر
آلدیم سو سراغین سولی پیکان آراسندا
اوخلار منه من اوخلارا حسرت دولانوردوخ
بو حسرت بی اول و پایان آراسندا
اوچ شعبه لی بیر اوخ یتیشوب گوگلومی آلدی
تاپدی یارامی زخم فراوان آراسندا
گوردی که سینیق قلبیم اولوب محفل جانان
مکث ایلمه دی محفل جانان آراسندا
پیکانی بولوب یاریم اوچون پیک محبت
ویردیم اونا منزل دل ویران آراسندا
اوخلار اوخا پیوندیدی هر چند بدنده
پر آچدیم او چوخ ناوک پران آراسندا
یاغدیردی بو قوم اوستومه باران خدنگی
سیل اولدی قانیم آخدی او باران آراسندا
مین دفعه حسین دوغرانا حقی گنه قویماز
ضایع اولا بو فرقه بطلان آراسندا
🌹 حاج حسن جهازچی🌹
بو وسعتیله یر یوزی من خانه بدوشم
یر یوخ منه بو عالم امکان آراسندا
الله ایوینی مامن ایدم قویمادی دشمن
مسکن ایله دیم من بو بیابان آراسندا
ویرانه نی آباد ایدرم قانیملن من
عالم گوره تا گنج اولی ویران آراسندا
بیر فلک نجاتم اوزوم اوز غرقیمه خوشدل
بحر کرم خالق منان آراسندا
بیعت ایلمز فاطمه نین اوغلی یزیده
مین دفعه اگر دوغرانا میدان آراسندا
ناپاک الینه پاک الیمی ویرمرم اصلا
قربان کیمی تقسیم اولونام قان آراسندا
من ساربانا بو الی ویرم نه یزیده
گور هانسی برازنده دی قرآن آراسندا
آغلالا منه شیعه لرین تا به قیامت
ساخلالا عزا قالسالا زندان آراسندا
بو فاجعه تاسیس اولونوب روز سقیفه
تصویب اولونوب فرقه شیطان آراسندا
🌹صدرالدینی🌹
عشقونده یانوب بال و پریم سهلیدی یا رب
بیر نحویله کیم شمع شبستان آراسندا
قان بحری تلاطم ایلدی یخدی بو چولده
بیر سرو کیمی اوغلومی طوفان آراسندا
بو عرصه ده سو ویردیله خار ستمیله
بیر غنچیه مین بلبل خوشخوان آراسیندا
شادم بونا اوز قانیمه دین اوسته بویاندیم
جانانیمه بیر هدیه دی قان جان آراسندا
صد شکر اولا اوز عهدیمی پایانه یتوردوم
قالموبدی قصور اول و پایان آراسندا
هر تیر بلا گلدی اوزوم باغریما باسدیم
یر ویردیم اونا بو دل سوزان آراسندا
بیر برهه زمانی ایکی استاد حضورین
صدری ایلدی درک دبستان آراسندا
شرکت ایلدی یازدیلا بو سوزلری باهم
خوشدور دیوله آدلاری عنوان آراسندا
استاد سخن ذهنی و مرحوم فراهت
گوهر گتوروبلر در و مرجان آراسندا
اون بیتی ده منضم ایلدی سید صدری
مشهوریدی خادمدی محبان آراسندا
