اربعین
اقباله باخ حسین من هارا کربلا هارا!
گلدی دوباره عطرون آلا ئولمین باجون
آخر سفردی کرب و بلایه دوشوب یولوم
بیرده چتین موفّق اولا ئولمین باجون
سندن صورا همیشه محرّمدی زینبه
ساخلار سنه ئولونجه عزا ئولمین باجون
آخر زیارتیمدی حسین قبرون اوستیم
گلمز دوباره بیرده بورا ئولمین باجون
اقباله باخ که سن سورنن یئرده آغلورام
ای کاش ئولیدی ایندی اَخا ئولمین باجون
سندن صورا حسین نلر اولدی دینمورم
بیر آز گرک بو ظلمی آچا ئولمین باجون
سعد اوغلی حکم ائدوبدی قوشون دولدی خیمیه
اولدی اسیر شمر دغا ئولمین باجون
اوت ووردولار خیامه داغیلدی چوله حرم
آختاردی راه چاره تاپا ئولمین باجون
گوشواره لر آلوندی حسین سیلی ضربینه
فکر ایله گور قالوب نه حالا ئولمین باجون
بیر بیر دوشور خیاله گیچن گونلریم حسین
آغلور سنه اورکده یارا ئولمین باجون
آت دیرناقی هارا بو مقدّس بدن هارا
قربان اولا یارالاریوا ئولمین باجون
ئولسیدی بیر غلام اونا ایلردیلر کفن
واردور یئری بو درده یانا ئولمین باجون
سن شاهیدون تاپولمادی امّا کفن سنه
سویلر همیشه وااسفا ئولمین باجون
آل علینی بزم شرابه آپاردیلار
سن وئر اجازه عرض ائده تا ئولمین باجون
هر درد و غصّه بیر یانا وای خیزرانیدن
لبلر بولوندی ائتدی نوا ئولمین باجون
شامی کنیز ایستدی زهرا عزیزینی
قالدی او دم بیر آیری حالا ئولمین باجون
وئرسن اجازه قارداشیم عبّاسه باش چکوم
دائم ائدر او شیری دعا ئولمین باجون
قدّی اوجیدی بیر بالاجا قبریده یاتوب
قربان اولا قلم قولونا ئولمین باجون
گلدی دوشندی زینب علمدار قبرینه
سسلندی دور گلوب یانیوا ئولمین باجون
بو قانلی پرچمی یتورم یثربه گرک
سوغات اونی گرک آپارا ئولمین باجون
امّ البنینه مشکیوی وئرّم مدینه ده
غمخوار اولار سنون آناوا ئولمین باجون
بنده حقیر «صادقیم» یا حسین بویور
جنّت حواله سی یازا ئولمین باجون
