وداع امام حسین ع
آز یاپیشدیر سینمه سوزیله یانمیش سینه نی
چک دوداقیمدن دوداقون بیله یاندیرما منی
من سنه بیر بوسه بوشلی شامیده گورم سنی
اوپ نقدری اوردا اوپسون یاره یاره قوی گیدیم
******************🍃🌹🍃
باخما سنون خیردادور ای آهوی اهل حرم
من سنه زهرا گوزونده باخمیشام هر بیر قدم
آغلیاندان دوشور یادیمه یثربده او دم
آغلیوردی فاطمه دیلده شراراه قوی گیدیم
******************🍃🌹🍃
حیدره خاطر دالیجا مسجده قاچدی ننم
سنده گلدون مندن اوتری قلبیده درد و الم
سن منیم خیردا آنامسان من گرک آتدان انم
حرمتون واجبدی زهرا تک بو زاره قوی گیدیم
*****************🍃🌹🍃
گون که آخشام چاقی باتدی من بویاندیم قانیمه
آی چیخاندا سنده چیخ سرون دیمه نسوانیمه
ساخلارام سینمده یر گل قتلگهده یانیمه
گوزلرم اوردا بالام جانی دوباره قوی گیدیم
******************🍃🌹🍃
ایندیدن عمن کیمی اورگش فراقه گیت بالا
دوش قوجاقیمدن سونه سوز علاقه گیت بالا
اللها خاطر سنی آلدیم قوجاقه گیت بالا
آغلیوب چوخ سالما بابانی فشاره قوی گیدیم
*********************🍃🌹🍃
هاموزی تاپشورمیشام اللهه من تک تک قیزیم
سن بولورسن که آنام گوزلور منی گویچک قیزیم
اللی ایلدی حسرتم زهرایه سن الچک قیزیم
رحم ایله گوزیاشیمه باخ انکساره قوی گیدیم
******************🍃🌹🍃
سن که دلداره بو آز سنیله چوخ وابسته سن
چرپنور قلبین سینونده قوش کیمی دلخسته سن
بو نه عالمدور هله من گیتمه میش جان اوستیه سن
جان ویرور گویا قفسده بیر قناره قوی گیدیم
******************🍃🌹🍃
((داود صادقی تبریزی))
