احوالات راه شام زبانحال حضرت رباب س

بو طرفده بیر قوری نی کیمی ائدورم نوا من بینوا

او طرفده چنگ و رَبابیله بیزه پیشواز ایدوب اشقیا

قاریشوبدی بیربیره نای و نی چخوب عرشه ناله ایله نوا

بو طرفده ناله رباب ایدر او طرفده ناله رَباب اوغول

** * * * * * * 🍃 🌹 🍃 

نه اولوبدی بیر اوشاقا ستم سنه یوز ویرن بو ستم کیمی

بیر آنایه نه یتیشوب اَلم ایویمی یخان بو اَلم کیمی

ائله دلده موجه گلوبدی غم داشوری گوزوم یاشی یَم کیمی

نه اولار غمون کیمی بیر عزا نه منه مثال مصاب اوغول

* * * * * * * * * * 🍃 🌹 🍃 

غم و غصّه یوز وئروری گوزوم باخوری بو شهریده هر یانا

گورورم که بیر سودامر بالا آلوب اوز قوجاقینه هر آنا

آخوری عذاره گوزوم یاشی گلورم فغانه یانا یانا

ایشیدن سیزیلتیمی سویلوری یانوری اود اوسته کباب اوغول

** * * * * * * * 🍃 🌹 🍃 

ایکی حسرت اللریمی گهی دیزیمه قووشدورورام علی

گهی سینمین سودی موج ایدور سینمی اوغوشدورورام علی

بو طریقیله اورگیمده کی اودیمی سووشدورورام علی

چوخ عجبدی صاق قالوب ئولموری بو ایوی خراب رباب اوغول

** * * * * * * * 🍃 🌹 🍃 

دگوری صبا یِلی نیزه ده حرکت ویرور بالا تِل لره

پوزوری شماتت ائدنلری ایدوری ملول بو منظره

او غمیکه یاندورا دشمنی گور اولار نه سوزشی مادره

آنانین داش اولسا اگر دلی گور ایدر تحمّل و تاب اوغول

** * * * * * * * 🍃 🌹 🍃 

بیر ینون بالاسینی رسمیدور ائلیه بیر اوچی شکار اگر

آناسی دالنجا دوشر ملر بالاسی گیدن یولی طیّ ایدر

باشیوین دالنجا اودور دوشوب بو ایوی یخلمش آنان ملر

ائدر اوز دقایق عمرینی اجلی گلینجه حساب اوغول

* * * * * * * * * 🍃 🌹 🍃 

فلک هدایته شمسدور آتاوین کسوک باشی نیزه ده

قمر منیریدی تک به تک هامی قوم و قارداشی نیزه ده

او گویون ستاره سی دور باشون مه و مهر یولداشی نیزه ده

ایله بیر ستاره گوروب نه یر نه بو هفت پرده قباب اوغول

** * * * * * * * * 🍃 🌹 🍃 

هله گرمیدور ائله داغ دل که بولنمورم اثراتینی

بولرم مرور زمانیله بو مصیبتین حرقاتینی

ایشیده اگر بیر آچوخ قولاق بو یارا دلین ضرباتینی

غم اودی بولر سو کیمی ایدوب بو یارالی قلبی مذاب اوغول

* * * * * * * * * * 🍃 🌹 🍃 

آناوین الیندن آلوب ایله بو ملال تاب و توانینی

که چکوب سس آغلوری باخموری ایشیدولّه داد و فغانینی

منه ویرسه لر او کسوک باشون یووارام سرشکیله قانینی

گلسرخ تک ئوپوب ایگلرم سپرم او گل یوزه آب اوغول

** * * * * * * * 🍃 🌹 🍃 

هله بو اسارت غمفزا هله بو شماتت اشقیا

اولور آغلاماقلیقا مانعیم دئیه بولمورم سوزیمی بالا

دولانوب اگر گله بیر زمان بو اسیرلیقدان اولام رها

ایله آغلارام یم اشکیمه گورونر بو چرخ حباب اوغول

** * * * * * * * * 🍃 🌹 🍃 

بیر حسین نوکری که اونون بو حسینه چوخدی محبّتی

لقبی هنرور آدی حسین حاجی بقّال اوغلیدی شهرتی

دیدی یاز «حسینیه» اصغرین باشنا بو شرح مصیبتی

باشیوی جداده گورن دیر گل گلستان رباب اوغول

** * * * * * * * 🍃 🌹