حضرت علی اصغر ع
بسکه سن لب تشنه قالموشدون علی
گل کیمی سولموش سارالموشدون علی
سو سراغین اوخدان آلموشدون علی
گیتدون اولدون قانیوه غلطان اوغول
* * * * * * * * * 🍃 🌹 🍃
زهرلی اوخدا نه لذّت تاپموسان
یاتموسان خوش استراحت تاپموسان
ای سولان غنچه طراوت تاپموسان
اولموسان بیر لاله ی نعمان اوغول
* * * * * * * * * * 🍃 🌹 🍃
حقلیم موجه گلوب اشکیم داشا
درد و غم دریاسی تک باشدان آشا
بو بوغازون اوخ بیچوب باشدان باشا
یا کسوبدور ناوک پیکان اوغول
* * * * * * * * * * 🍃 🌹 🍃
نسگلیم اودلار جهانی برملا
وار یری هر سود امر سودسوز قالا
کیم گوروب اوخلانسون آلتی آیلوق بالا
نوک تیر اولسون اونا پستان اوغول
* * * * * * * * * 🍃 🌹 🍃
نه منم یالقوز یانان احوالیوه
یاندی دشمنلر آلشدی حالیوه
حرمله گوندردی استقبال
زهرلی اوچ شعبه بیر پیکان اوغول
* * * * * * * * * 🍃 🌹 🍃
تا سنی ویردی نشان شه دشمنه
من ایشیتدیم گلدی دشمن شیونه
چوخ امید ایتدیم ویره لّر سو سنه
حیف امّیدیم اولوب حرمان اوغول
* * * * * * * * * * 🍃 🌹 🍃
حرمله باخدی گل نورسته سن
حسّ سیز بلبل کیمی دل خسته سن
اوخلینده گوردی سن جان اوسته سن
نه بهانه ایلدی عنوان اوغول
* * * * * * * * * 🍃 🌹 🍃
قلبیمی آهیله بیجا اویمارام
ناله دن بلبل کیمی من دویمارام
قانلی قونداقون یر اوسته قویمارام
خوشدی سینمده اولا مهمان اوغول
* * * * * * 🍃 🌹 🍃
قویدی هر کس خوان بزم یاره گُل
همّتیجه یولّادی دلداره گُل
امّ لیلا ویردی بیر صد پاره گُل
منده ویردیم غنچه ی خندان اوغول
* * * * * * * * 🍃 🌹 🍃
گون ایوینده سن سوسوز جان ویرموسن
شاهد اول بو عهد و پیمانیمده سن
قسمت اولسا اُلمه سم گورسم وطن
گون ایوینده اگلشم سوزان اوغول
* * * * * * * * * 🍃 🌹 🍃
نسگلون دلدن فراموش ایتمرم
آتشین اُلسمده خاموش ایتمرم
هیچ سرین سو جرعه سی نوش ایتمرم
تا اُلم عهدیم تاپا پایان اوغول
* * * * * * * * * * 🍃 🌹 🍃
آلتی آی هر نصف شبلرده نجه
سود ویروب وقتونده قویمازدوم گجه
سود امن وقتون آیلسام بو گئجه
نیلیوم من خانمان ویران اوغول
* * * * * * * * * 🍃 🌹 🍃
غفلت اولسیدی آج اولسیدون اگر
سینه مین سود موجی ایلردی خبر
من سنه نامهربان اولدوم مگر
آج سوسوز ویردون آناسیز جان اوغول
* * * * * * * * * * 🍃 🌹 🍃
ایل بُلر فوت اولسا گر بیر سود امر
کیم بُلر بیچاره مادردن خبر
آخشام اولجاق سینه سین بیر سود گزر
سود دیمه بیر آتش سوزان اوغول
* * * * * * * * * * 🍃 🌹 🍃
خون ناحقّون سَپیلدی گویلره
قانلِ خط ویردی سپهر اخضره
انتقامون قالدی روز محشره
وای اگر عدل ایلسه دیوان اوغول
* * * * * * * * * 🍃 🌹 🍃
دیدیروب اوخ دایه سی سن گولموسن
گولماقون قان آغلادیرمیش بُلموسن
وای آنان اُلسون علی سن اُلموسن
ویرموسن جان دوشموسن بیجان اوغول
* * * * * * * * * 🍃 🌹 🍃
نسگلون اودلی اوکلر داغلادی
چاره من بیچاریه یول باغلادی
غنچه وش گولدون یاران قان آغلادی
غنچه گولسه گوسترور القان اوغول
* * * * * * * * * * 🍃 🌹 🍃
کوسموسن مندن دیمیشدیم آغلاما
وورما دیرناخ سینمی چوخ داغلاما
گل گذشت ایت پوزشه یول باغلاما
آغلامن آغلار گوزه قربان اوغول
* * * * * * * * * * * 🍃 🌹 🍃
اوخ دگنده قوخموسان دیسگینموسن
دوشموسن ضعف عالمینده اینموسن
هر دیلیله دیندیرنده دین مینموسن
بس نیدیم من خانمان ویران اوغول
* * * * * * * * * * 🍃 🌹 🍃
بسکه گوزدن گوزیاشی توکدوم سنه
سیل تک موج ایتدی داشدی دامنه
دوندی دریایه یقین اولدی منه
تیز قوپاردار قانلو بیر طوفان اوغول
* * * * * * * * * * 🍃 🌹 🍃
تیز او طوفان قوپدی تاخیر اولمادی
هیچ کیمی گردابه من تک سالمادی
سن کیمی روحیمده الده قالمادی
ایلدی مستغرق طغیان اوغول
* * * * * * * * * 🍃 🌹 🍃
ساخلارام بو انتقامی محشره
ایلرم شکوه خدای داوره
سینمی ویرّم نشان پیغمبره
ایلرم دل دردیمی اعلان اوغول
* * * * * * * * * 🍃 🌹 🍃
بوش دوشه سالدیم سنی من آغلادیم
سن خراش ایتدوقجا سینه داغلادیم
لاعلاج اولدوم الیوی باغلادیم
بُلمدیم جبراً آچار دوران اوغول
* * * * * * * * * 🍃 🌹 🍃
حقلیم باشی آچوخ قاچسام چوله
ناله دن ناله یولون آچسام چوله
دسته دسته ساچ یولوب ساچسام چوله
آغلیام چوللرده سرگردان اوغول
* * * * * * * * * 🍃 🌹 🍃
من دیردیم آغلاما بیر یات اوغول
خون دل گوزیاشیمه آز قات اوغول
نه منی بیله گوزوندن آت اوغول
گوزلرون قربانی بو گریان اوغول
* * * 🍃 🌹 🍃