اربعین
تل سلام اوسته سلامه دل اولمادی
آلموشدی ذوق قبر حسین اختیارینی
البته نطق اولماز ادای کلام ایده
عاشق گورنده وصل زمانینده یارینی
بولمم سوریندی یا یریدی یتدی قبرینه
واضح سوروشما حفظ ایله زینب وقارینی
بلبل نجه تاپاندا گُلین گلستانده
شرحِ فراقه اوّل ایدر اعتذارینی
ثاراللّهین مزارینه زینبده تا یتوب
آچدی بیانِ حاله لبِ دُر نثارینی
عرض ائتدی آلتی گوشه لی قبره باجون فدا
چوخ غملنوب دل آختارور اوز غمگسارینی
قبرون مجاوری یوخوموش بیله توز باسیب
سیلَّم سرشک چشمیله ایندی غُبارینی
شامه گیدنده نعشیوی دفن ایلینمدیم
عفو ایله بو قصورین اولان شرمسارینی
گوردون نجه آپاردیلا گیتدیم نه حالیله
آلمیشدولار بو غمزده نین اختیارینی
بولدوم علاوه ساخلیوب ایتسون صبا کفن
گل جسمیوه چولون خَس و خاشاک و خارینی
آلدون علی اصغری آغوشه جان کیمی
ایتدون رُبابین حشره کیمی ناله کارینی
باخ بیر رُبابه سینه سینه سود گلوب گَزَر
دشت بلانی آختارار اوز شیر خوارینی
ویر سود امر بالاسینی آلسون قوجاقینه
بوش کورمه سینله اهل حرم تا کنارینی
نی تک گلوبدی نالیه بو مدّتی مُدام
هر دم آچوی عُذارینه گوز آبشارینی
هجران غمی نوای حرم نالۀ رُباب
بالمَرَّه زینبین آلوب اَلدن قرارینی
بو مدّت مَدیدی دوزوب هجره عاقبت
گَتدیم مزارون اوستونه محنت قطارینی
معذوریدی رقیّه قزون قالدی شامده
ویرسن اجازه شرح ایدرم اعتذارینی
ویرانسراده حسرتیله ویردی جان قزون
مانعدی شرم شرح قیلام احتضارینی
سولدی حجاز گلشنینن تازه غنچه سی
شامین هواسی ایتدی خزان نوبهارینی
تاپوتین ایلدیم او قزون خشت پاره دن
گور بو تراب عزیزه سی انجام کارینی
ویردیم تَیَمُّمیله او مظلومه غُسلینی
آچدیم اگر چه اُستونه گوز آبشارینی
اوز قاره کوینگین اوزونه ایلدیم کفن
تا تیره شام شامین ایدم روزگارینی
بیر کیمسه اولمادی بالامین قبرینی قازا
قازدیم اوزوم او طفل یتیمه مزارینی
ویرانسراده دفن ایلدیم بیر خزینه من
صرّاف روزگار بولَنمَز عیارینی
قبره قویاندا آنّینی اُپدوم دیدیم بالا
یات چک بو شهریده بی بی وین انتظارینی
بیر گون اولار که شامی دوتار قدر و قیمتی
عالم بولر بیز آل علی اعتبارینی
قویمام قالا او شهریده یالقوز رقیّه نی
قویدوم اوزوم اونیله بو امرین قرارینی
گر اُلمه سَم مدینیه گِتسَم دایانمارام
ترک ایلرم پیمبر رحمت جوارینی
بیر باش گلوب خرابه ده اولّام مجاورون
کسب ایلرم مجاورتین افتخارینی
یاندیرّام آه شمعیمی هر جمعه آخشامی
روشن قیلام او روضّه تاریک و تارینی
گوز یاشیمیله سو سَپَرم هر گیجه گونوز
مژگانیمیله سیلَّم او قبرین غُبارینی
توزلی مزارینه دوشرم فرشِ زلفیمی
حفظ ایلرم اُلونجه او روضه وقارینی
مندن سوروشسالار که هارالیدی بو بالا
ویرّم نشان حجازده یثرب دیارینی....
هر اوچ یاشندا قز یولی دوشسه خرابه دن
آلّام کناریمه اُپَرَم گلعذارینی
مین دللّریله دل دیَرَم بلکه دیندیره
گلزاریمین خموش مصیبت هزارینی
قالّام او قدر تا اجلیم درک ایده منیم
ویرّم حیاتیمین باشا لیل و نهارینی
گر نقص شأنی اولسا جوارینده یاتماقیم
قیلّام من اختیار او شهرین کنارینی
توپراقلار اوسته گاه اوتوراردی او خسته دل
معلومیدی که غم لر آلوب اختیارینی
هر سمتدن علاجی کسیلمیش یتیمه تک
بیز دَنده گیزلَدَردی غم آشکارینی
هر دم ووراردی بارماقیله نقش توپراقا
بیر آز باخوب سیلردی او نقش و نگارینی
آخرده یازدی توپراقا بیر کلمه سیلمدی
بیر آز تیکوب او کلمیه چشم خمارینی
بیردن اَگیلدی یازدیقینی اُپدی آغلادی
قویدی او کلمه اوسته دل داغدارینی
آهسته بعضی سوز دیدی امّا ایشیتمدوخ
آلدوق فقط او تنگ نفسدن شمارینی
آخرده سیلدی صورتیله یازدیقی سوزی
آلدی حرملرون هامی دلدن قرارینی
ایتدیم سؤال ای بالا نه یازمیسان یره
چوخ سالموسان گوگل لره محنت شرارینی
عرض ایتدی عمّه اکبریمین یازمیشام آدین
نیلوم غم اهلی آختارار اوز غمگسارینی
ایمدی اَلیم یتیشموری دامان وصلینه
طرح ایتمیشم آدیله گلایه شعارینی
چون بولموشم که آخر عمریمدی بو گیجه
عمریم قوتاردی روز و شب مُستعارینی
بیر اولدوزام که آخماقیما مایل اولموشام
قبره چکر اُلوم بو ستاره مدارینی
فکر ایلدیم که قارداشیما ایلیوم خبر
بلکه گلوب گوره باجیسی احتضارینی
هر نیلدیم وسیله پیامه تاپانمادیم
بولدوم گِله یری عدم اختبارینی
یازدیم آدین یره سوزومی آدینا دیدیم
ایتدیم سفیر اکبره اسم کُبارینی
عرض ایلیه بو عرضیمی قارداشیم اکبره
قارداش آتارمی خواهر محنت دچارینی
جان اُستیم یولوندا قالوب منتظر گوزوم
دور بارگاه خاطره بو غصّه بارینی
لطف ایله همّت ایله سنی اُلمه میش گوروم
آز زحمتیله دلدن آزات غم فشارینی
انصافدور رقیّه اُله گورمیه سنی
حسرت مکان ایده جگر داغدارینی
تئز گل بویون بلاسین آلوم آز قالور یخا
خوناب دل بنای دل پایدارینی
گوندردیم آه قاصدیمی کربلایه من
تا شامه دعوت ایلیه غم شهریارینی
عرض ایلیه که شام غریباندی شامده
گل بیر منوّر ایله بو ظلمت دیارینی
چوخ وار امید آتام گیجه ویرانیه گله
بیر یاد بود ایلیه بیز غم قطارینی
گلسه بابام خرابیه گر قویمارام گیده
سالّام کمنده پای دل بُردبارینی
عرض ایلرم که هر یره گیتسن آپار منی
گوزدن کناره آتما بو هجر اشگبارینی
بیرده شکسته دل قیزیوی آل کناریوه
ترمیم قیل بو شیشۀ دل انکسارینی
دریای بی کرانۀ محنت غریقیم
ای کشتی نجات اوزون دوت کنارینی
« شأنی » بو شرح محنتی یاخشی شروع ایدوب
ناقص قویوب بو نوحۀ بس شاهکارینی
تعقیب ائتدی « ذهنی » « سائل » بو سوزلری
سالدی ایشه او خامۀ زرّین نگارینی
لطف ایت بابا بو « ذهنیه » هر ایلده حجّیله
فیض زیارت حرم هشت و چارینی
خاصّه بو ایل گوتورسون هامی اهل بیتی نی
حجّ ایلسونله خانۀ پروردگارینی
اوردان گلوب بو شامده شوریله باشلاسون
پژمرده عُنچَن اُسته نوای هزارینی
