حضرت رقیه س
بختی بو طفلون اوجیدن دوشدی سرازیره
یکسر آتا قارداشلارین چکدیله شمشیره
کرب و بلادن شامه دین باغلاندی زنجیره
یاتماق اونا اولدی حرام جان وئردی دینجلدی
قالدی اراده بی کفن الله بالام ئولدی
بیر کیمسه نم یوخ دفن ایدن الله بالام ئولدی
آسوده اوُلدی ظلمیدن الله بالام ئولدی
هر زحمته ایتدی دوام جان وئردی دینجلدی
بعضی گئجه اکبر بوئین اوخشاردی یاتمازدی
شمری گورن گون اوُل گئجه قورخاردی یاتمازدی
چوخ یالواراردیم یات قیزیم آغلاردی یاتمازدی
ایندی نجه گور اولدولار جان وئردی دینجلدی
غسلون وئرن یوخدور ندیم ئولدی بالام قالدی
اوز معجرینله دفن ائدیب ئولدی بالام قالدی
سونمز اودون یاندیم دئدیم ئولدی بالام قالدی
هی آغلارام آرتار یارام جان وئردی دینجلدی
یاتدی حسینین بلبلی یانام الولانّام
یاده دوشر شیرین دیلی یانام الولانّام
واردور بونون بیر نیسکینی یانام الولانّام
گیزلین دئدی عمه آجام جان وئردی دینجلدی
زنجیر کسن قولارینون نقشینه باخدوقجا
کهنه حصیردن آلنینون فرشینه باخدوقجا
یاننام بالامون خوار اولان نعشینه باخدوقجا
بو دللریله اوخشارام جان وئردی دینجلدی
ای هاشمو ن اوغلانلاری عباس و یا جعفر
هاردا قالوبسیز پس بوگون ای قاسم و اکبر
آخر سکینم (رقیّم) یئرده دور زینب سیزی گوزلر
چوخ اینجیدوبدور اهل شام جان وئردی دینجلدی
غساله گورسه آغلیور شمرون جفاسیندن
مالش ویرنده قویمارام قمچی یاراسیندن
زهرا آنامه بو قیزی باشیم بلاسیندن
من بیر نمونه یوللارام جان وئردی دینجلدی
یاز آغلا نوحه یحیوی تا وار نفس جاندا
مظلوم حسینون بیر قیزی دفن اولدی ویراندا
چوخ اینجیوب اشکنجه دن آخر اوزنداندا
شهزادۀ والا مقام جان ویردی دینجلدی
