حضرت علی اصغر ع
سوسوزلوقون اثریندن دوداقلارون قوریوب
تعجّبم نجه بو درده طاقت ایلموسن
سوسوزلوق آجلیق اودی جسمیوه شراره سالوب
گینه بو قالماقیویلن مهارت ایلموسن
سودان کناره دوشن ماهی تک چالخلورسان
اوزیویده منیده خسته حالت ایلموسن
کسوبله راه فراتی نه وار سویوم نه سودوم
ساری گله بو جمالی شباهت ایلموسن
دین اولیدی فراتین سویونی باغلیانا
ندن آنانی بالادن خجالت ایلموسن
نه قدر ترپدیرم ساکت اولموسان بیر آن
یوموب گوزون بالا بیر استراحت ایلموسن
گهی الون گوتورورسن دوداقیوه قویوسان
بو رمزیله عطشوندن اشارت ایلموسن
شیرین دلیله رقیّم سنی دانیشدیروری
ندن گلوب یوزینه بیر محبّت ایلموسن
قماطیده الیوی باغلادیم بغیشله منی
نه چاره سینمی یکسر جراحت ایلموسن
ووراندا سینمه درناق بالا اورک دُیونور
غریب آنان حالینی هیچ رعایت ایلموسن
بیله خیال ایدوسن بولمورم سوسوزلوقیوی
اودور کوسوبسن اشاریله صحبت ایلموسن؟
خدایه آند اولا چاره یولی اوغول کسیلوب
بو پوزقون حالیمه سن بیر رعایت ایلموسن
مدینه دن بورا دین لای لایوی دیورم
قانادلانوب نیه بس رفع محنت ایلموسن
دلون اولیدی دییدون اورک سوزین آناوا
گوریدیم اوندا عطشدن شکایت ایلموسن
گیدوب فراته گتورسون سو اکبریم بو گجه
چخوب قباقه ندن عرض حاجت ایلموسن
گتورسه سو سنی سیراب ایده لّر اوّلده
هامی بولور که سوسوزلوقدا شدّت ایلموسن
تیکوب گوزین سنه (کیکاووسی) قیامتده
یتر سعادته گورسه شفاعت ایلموسن
