شهادت حضرت علی اصغر ع
بالام یاتوب راحت اولوب دینجلوبدی دیندیرمه
قماطین آچ رختینی سوی تازه دن گییندیرمه
آناسینا باغلامامیش یاره سین نشان ویرمه
مگر آنایه بالانون بیله حالی آساندور
☘☘☘☘☘☘☘
دگنده اوخ آغلامادی باخدی بیر منه گولدی
نه علته گولدی اونی خالقیم اوزی بیلدی
الیمده ال ایاق چالیب تشنه جان ویروب ئولدی
الیم قولیم سینم اودور رنگ رنگ الواندی
☘☘☘☘☘☘☘
بیر عهد ایتمیشیدیم ازل حی کردگاریله
ویرم او عهده خاتمه من بو شیر خواریله
سو ویردی حرمله بونا تیر زهرداریله
اوخیله سیراب ایلدی غم یمه که عطشاندی
☘☘☘☘☘☘☘
سوسوزدان اولموشدی بالام غنچه لیقدا پژمرده
او حالی حالیمی منیم ایلمیشدی افسرده
و لیک قویمادی اولام حرمله دل آزرده
دئدی سو ساخلیان بونا بوسه شعبه پیکاندی
☘☘☘☘☘☘☘
همان باجیسی که بونا متصل دیوب لایلای
چتیندی دوزماقی باجی حالنه اونون وای وای
یقین گورنده سسلنور تشنه قارداشیم ایوای
باجون فدا یوزگوزیوه یوزگوزونده نه قاندی
☘☘☘☘☘☘☘
قانه باتان آنوگین آچ سیل بوغازینین قانین
آناسینا ویرمه نشان زخم نوک پیکانین
بو قانیله من بویادیم عرش و فرش دامانین
سماده قانی اصغرون حشره دین نمایاندی
☘☘☘☘☘☘☘
ویروبدی آغلاما قلقین اجرینی غریب طوس
حسینه آغلیان اودور اولماز حشرده مایوس
دوباره خامه دفتره شاننی ایدن مانوس
حسن رحیمی زاده دور شاه طوسه مهماندی
🍁🍁🍁🍁🍁🍁🍁