شهادت حضرت ابوالفضل ع
علم بیرسمتیده بیرسمتیده مشکون دوشوب پاره
قلج بیریاندا صاحب‌سیز فرس بیریاندا آواره
وجودونده دگوب ازبس که یاره اوستونه یاره
قیزیل‌گل تک بدن خنداندی ای گل پیکریم قارداش
ازل گون تا لبالب اولدی ساغر نور وحدتدن
ایچوب مست و خراب اولدون می ناب محبّتدن
ایله سیراب اولوبسان بادة جام شهادتدن
که یکسر عالمی ترک ایتموسن ای یاوریم قارداش
سن ای وادی حیرتده اولان مست رخ جانان
یتن طیّ مراحلده مقام فقره لب عطشان
وصاله یول تاپوب دین اوسته اولدون قانوه غلطان
علایقدن داخی اولدون بری ای یاوریم قارداش
عَلَم نصب ایلدون ای شیر دل میدانه شاهانه
داغیددون صفلری تاپدون ظفر اول قوم عدوانه
آتام حیدر کیمی جنگ ایلدون بی‌باک و مردانه
ولی آخرده آخدون ای ایشقلی اختریم قارداش
علی رزمین مجسّم ایلدون اشراره صولتده
حنین و بدری سالدون یاده ابراز شهامتده
الوندن ال گوتوردون آرزوی قاف وحدتده
مرامه یتدون ای عنقای خونین شهپریم قارداش
بلادریاسی طغیان ایلیوب قان دوتدی صحرانی
ستم ابری بو دشته یاغدیروبدور درد بارانی
سموم کینه تا ساحلده یخدی تشنه سقّانی
منیمده دولدی موج دردیله دور و بریم قارداش
بنات مصطفانون غصّه‌دن سلب اولموش آرامی
تیکوبلر گوز یولا لب‌تشنه قیزلار الده سو جامی
مصیبت سنگباراننده سیندی سینه‌لر جامی
قیریلدی تار امیّد ای درخشان گوهریم قارداش
سنیدون بو سپاه ایچره منه فرمانده لشکر
سنیدون روز هیجاده پناه آل پیغمبر(ص)
سنیدون خرمن بیداد ده چون شعلة آذر
سنیدون ظلمت محنتده ماه انوریم قارداش
عجب کامه چاتوب ترک ایلدون دنیا و عقبانی
رضای حقّی آختاردون نه حور و شاخ طوبانی
بو حالاتی دونن اثبات ایدوبسن ای وفا کانی
بو سودائیله اولدون اهل عشقه رهبریم قارداش
بوگون‌باشدان گیچوب جان وئرموسن شوقیله‌جانانه
ولایت امرینی تفسیر ائدوبسن اهل دورانه
وفا درسین گوزل تعلیم ائدوبسن اهل ایمانه
سنه جانیم فدا ای با وفا فرمانبریم قارداش
گوزمدن نهر علقمده وجودون تا نهان اولدی
دئدیم دلدن که شهبازیم یقین تیره نشان اولدی
همای عشقه جولانگه فضای لامکان اولدی
دئدون گرچه اولوب تیره، نشان بال و پریم قارداش
دور ای سقّای غم‌پرور تدارک قیل سو اطفاله
یته تا تشنه آل‌مصطفی(ص) مخیمده آماله
یانارکون و مکان قلبی مصیبتدن بو احواله
سوسوز دور آل پیغمبر منیم ای کوثریم قارداش
دور ای آرام جانیم تشنه سرداریم اویان یاتما
دور ای ماه بنی هاشم محاق قانیله باتما
حرمده اهل بیتین گوزلرین، هجرونده آغلاتما
نجه گور آغلیری حالون گورنده گوزلریم قارداش
یازیبدور مطلعی بیر بندیله استاد بی همتا
آدی «عابد» تخلّصده ولیکن عارف بینا
او سر مشق اولدی «فانی» قلبنه بو شعر اولوب القا
نظر قیل اونلارا لطفیله ای غم‌پروریم قارداش
