شهادت حضرت علی اکبر ع
ای کمال حسنیده جدیم نشانی دور گئداخ
دور گئداخ ای لیلینون آرام جانی دور گداخ
کربلا عنوانینه باشلاندی برنامه بو گون
ایتدیقوم عهد الستی ویردیم اتمامه بو گون
سن کیمی بیر فدیه ویردیم دین اسلامه بو گون
سنده سرمشق ایله بو طرز وفانی دورگیداخ
من بو عهدی ایلمیشدیم خالق یکتائیله
کربلا صحراسینه گلدیم همان سودائیله
قیزلاریم آغلار قالوب امّا آنان لیلائیله
خیمه گاهی چولقیوب لیلا فغانی دورگیداخ
وار یری قان آغلاسام ظلمیله قانه باتموسان
عزّتی ترک ایتموسن دنیانی گوزدن آتموسان
امتحاندان چخموسان، نازیله راحت یاتموسان
منده تصدیق ایلرم بو امتحانی دورگیداخ
قانه غلطان پیکریله خاکه یکسان اولموسان
لیلی مجنون اولماقا بیر یاخشی عنوان اولموسان
وای منه بیر دسته گل تک یرده خندان اولموسان
دولدوروب اوراق گل دشت بلانی دورگیداخ
باش و جاندان گیچمیسن وصل نگاره یتماقا
قالموشام حیران بو یورقون پیکری حمل ایتماقا
نیلیوم گلمور یوزوم سنسیز خیامه گیتماقا
ای آناسی لیلینون روح و روانی دورگیداخ
نیلرم سن اولماسان بو عزّت دنیانی من
بولمورم آیا نجه آرام ایدوم لیلانی من
دلده یارا یوخ گورم بیرده ایله ثکلانی من
وای اوغولوای دور اونون ورد زبانی دورگیداخ
اوّلین مقتول نسل هاشمی آچ گوزلرون
گور بو رخساره آخان گوزیاشیمی آچ گوزلرون
عرش اعلایه اوجاتدون باشیمی آچ گوزلرون
سربلند ایتدون عحب اسلامیانی دورگیداخ
حقّی وار لیلا سنه هر لحظه هر آن آغلاسون
ذکر ایدوب احوالیوی تا جاندا وار جان آغلاسون
باشین آچسون اِرباً اِربا سویلسون قان آغلاسون
شهرتون بو نوعیله دوتموش جهانی دورگیداخ
قوی گوزون قانین سیلیم بو دیده سی گریانی گور
دولدوران ناله سسیمدی عرصه ی میدانی گور
دور دوتوم الدن گیداخ بیرده آنان لیلانی گور
سیل اشکی ویردی باده کربلانی دورگیداخ
ظلم منقذدن آخور شهلا گوزوندن قان اوغول
چوخ ووروبدور اوخ یاراسی فرقه ی عدوان اوغول
خانه ی زنبور تک جسمون اولوب شان شان اوغول
قویمارام یرده قالا بو خسته جانی دورگیداخ
باشون اوسته اوخشورام بیر شوره گلمیش بلبله
سن بولورسن بلبل شوریده نین عشقین گله
من بو احواله قالاندا قورخورام لیلا اُله
کشف اولا قلبینده کی سرّ نهانی دورگیداخ
اهل بیتیم خیمه ده ایمدی قوروب بزم عزا
لیلینی آلموش آرایه عترت آل عبا
قیزلاریم آغلار دیر وااکبرا وااکبرا
زینب کبری اولوبدور نوحه خوانی دورگیداخ
خیمه ده آغلار قالوب ایمدی آنان لیلا علی
چولقیوب دشت بلانی آه و واویلا علی
قورخورام میدانه گلسون زینب کبری علی
منتظر قویما قالا آل عبانی دورگیداخ
اوخ یاراسیندان دونوبدور جسم پاکون گلشنه
گوئیا بیر دسته گل خندان اولوبدور دامنه
بو نه حالتدور علی وای زینبه ایوای منه
ای قویان آغلار غمی کون و مکانی دورگیداخ
اوغلون اکبر جانینه ویرّم قسم جدّا سنی
قبروزون مشتاقیم ذکریم اولوب یالَیتَنی
بیرجه گورسم کربلا یولداشلاری سسلور منی
ای رجائی لنگه وورما کاروانی دورگیداخ
