حضرت علی اکبر ع
مقام خلته بیجا یتشمیوبدی خلیل
ایدوب خلیلی عجب امتحان خدای جلیل
بلوندوروب جبروت اهلنه بو اسراری
که مندن اوزگه خلیلین اورکده یوخ یاری
عبث خلیله خدا ویرمیوبدی بو جاهی
خلیل دلدن آتوب فکر ماسواللهی
یازولا سگز ذی الحجه لیله سینده خلیل
یاتوب گوروب یوخودا امر ایدور خدای جلیل
خلیل اولماز ایکی حب بیر دله جاگیر
برینی آتماسان اصلا دگل علاج پذیر
محبتون بیزه وار قویموسان آدوی خلیل
نقیض خلت اولور اولسا حب اسماعیل
گرگ بو قیددن اوز فکروی رها ایده سن
مجتیمده منیم، اوغلوی فدا ایده سن
اویاندی صبح زمانی خلیل ایدوب تردید
قالوبدی ترویه آدی گیجه اولوب تجدید
یاتوب صباح گیجه نی فکریله بقلب سلیم
گنه همان ایشه مامور اولوبدی ابراهیم
اویاندی شکی گیدوب یتدی ظنی حق طرفه
بلوب که امر خدا دور آدی قالوب عرفه
چاغوردی محضرینه هاجری بیوردی خلیل
صباح خلیلیمه مهماندی اوغلوم اسماعیل
ایدوب زیارته بیر دوست اوغلومی دعوت
لباسینی عوض ایله بالاما ویر زینت
او بزمه گیتمیه اوغلوم گرک حقیرانه
گوزینه سرمه چکوب ایله زلفنی شانه
سیاه طره سینه عطر وور معطر ایله
نقدر گلسه الوندن بالاما زیور ایله
ذبیحینی گتوروبدور همان گیجه هاجر
قویوب برابره کامنجه ایلسون زیور
خیال ایدوب که اوغول زلفین ایلسون شانه
سو سپدی اشکیله اول زلف عنبر افشانه
ال آتدی زلفینه شوقیله پیچ وتاب ویره
دوتوبدی اللرینی رعشه شانه دوشدی یره
دیدی فدا سنه ای نوردیدۀ هاجر
اوغول سبب ندی بلمم نیه الیم تیترر
ووراندا زلفوه شانه الیمده شانه دونر
گوروب خمیده قاشون قامتیم کمانه دونر
گوزون فداسی کنار اولما بو گیجه مندن
مشام جانه گلور آیرلیق ائیی سندن
اوغول گیدنده قوناق رسمدور آنا سوونور
منیم ولی اوره گیم بلمورم گینه دوگونور
چکنده گوزلروه سرمه ای گوزوم نوری
آخور گوزوم یاشی تبدیل ایدور غمه سوری
گورور اوره ک گوزی هاجرده بو قضایانی
مجسم ایلوری مد نظرده لیلانی
باخاندا هاجره لیلا گورور دل بینا
دیور گوزیمدن آخان اشک چشم وای لیلا
دگلدی مطلبه آگاه بینوا هاجر
صباح فدا اولاجاق اولجوان مه پیکر
ورندا زلفنه شانه گنه اسردی الی
بیله قیاس اولی لیلایه هاجرین عملی
بلوردی لیلی صباح اولسا اوغلی دوغراناجاق
شرار هجرله بر عمر قلبی اودلاناجاق
فقط بر اوغلیدی امیدی قوم و قارداشدان
اودور که گوز یاشی طوفان ایدوب آشور باشدان
بو فکریله اولا لنگر سنق سفینه سنه
باسور جوان اوغولین باشین اودلی سینه سنه
چوخ ایستورم که دیم اول گیجه نه عالمیدی
دینمورم ولی چون حشرگاه اعظمیدی
آنا بلوردی صباح اوغلنون شهادتیدی
اوغول بلوردی آنانون صباح قیامتیدی
نچکدی لیلی بیچاره شرح اولونسا اگر
قالار وقایع حال ذبیحیله هاجر
گرگ تعاقب ایدم باشدا کی قضایانی
ویرم تمامه قضایای عید اضحانی
اوگیجه صبحه کیمی عارضینده اشک بصر
الینده شانه ایدوب زیور اوغلونا هاجر
آچیلدی صبح ایدوب هاجره خلیل خطاب
اولور بوگون منه لازم اولا پچاق و طناب
پچاق آدی ایشدنده آنا اولوب بیتاب
دیدی قوناق گیدنه نه لزوم کارد و طناب
جواب ویردی خلیل خدا که ای هاجر
وار احتمالی شکاره ایشیم اولا منجر
شکارین ال ایاقین باغلارام طنابیله
باشین پچاقیله ذبح ایلرم شتابیله
گتوردی کارد و طنابی آنا ایدوب تسلیم
گوتوردی اوغلونی اولدی روانه ابراهیم
اوغول گیدردی منایه طرف وقاریله
آنا باخاردی دالنجا چوخ انکساریله
باخاردی قالب بیروح تک او بیچاره
آخاردی خون دلی گوز یاشیله رخساره
خیال ایدردی گر اوغلوم ضیافته گیدیری
ندن قدم بقدم گوز یاشیمی قان ایدیری
گنه حصار دلی لشگر ملال آلدی
بو قصه اکبر و لیلانی یادیمه سالدی
گیدنده رزمگهه مظهر رخ طه
نحاله قالدی بله بلمورم خانم لیلا
اوره ک گوزوم گوروری حالینی ولیک قلم
ایدنموری اورگیمده اولان مقامی رقم
بیرینی ایتمسه لیلا محبتی مجنون
نجه بولر ندی معنای حسن روز افزون
آنا گورنده قتاله طرف جوانی گیدور
او حاله قالدی گورن فرض ایدردی جانی گیدور
جوان اوغول قد رعناسینه سالوبدی کفن
باخان او حاله دیر برفیله دولوب گلشن
ولی بهار و خزان جمع اولوبدی گلشنده
گورنمیوب ایله ضدین اولا برازنده
ایدوبدی سرو قدین برف تک کفن مستور
یوزی بهار تک ایلر باخان گوزی مسرور
هوانون ایستیسی رخسارینه دوزوبدی عرق
یوزی قزل گله بنزر آچوب ورق به ورق
گون ایستیسیندن آچوب صورتی ایکی لاله
گل اوسته شبنمه بنزور دورب تری ژاله
دوداقلاری قورویوب کثرت حرارتدن
سالوب عطش گل رخسارینی طراوتدون
آناسی شانه ویروب زلفینی ایدوب پرچین
نه زلف مشگ خطا دور عبیر از فرچین
جسارت اولدی دیدیم من اوزلفه مشک خطا
اوزی بغشلسه اکبر بغشلنر بو خطا
باخان او طره مشکین و زلف پرچینه
حیا ایدر باخا مشگیله عنبر چینه
او آغ کفن او قرا زلف ایله خوشن یاراشور
قرار و صبرین آلور هر کیمون گوزی ساتاشور
او صورتیکه باخان گوزلرین قرارین آلور
تصور ایت آنا باخدوقجا گورنه حاله قالور
گورور ملاحتینی قلب زار و مجروحی
اورکده سوزش ایدور زخمی اودلانور روحی
دیور دایان دور علی گیتمه برده عطرون آلوم
باشوا بر دولانیم بوینوا قولومی سالوم
آتان ویروبدور اجازه دینمرم گیتمه
غریب آنان ولی بالمره بیله ترک ایتمه
دایان دویونجا گوروم گل یوزون گیدیرسن گیت
تکلم ایت ایشیدوم برسوزن گیدیرسن گیت
بولنمورم نجه شهزاده آیرلوب گیتدی
بوقدر وار که یخلدی آناسی غش ایتدی
مین ایل یازانلار اگر یازسا صبر لیلادن
محالدور اولا معلوم قطره دریادن
جوانی گیتسه الیندن آنا ئولر ئولمز
بونی جوان بالاسی ئولمین آنا بلمز
سوزی مخلص ایدوم بحثه اولماسون منجر
نه چکدی لیلی بیچاره بیر بولر هاجر
