اربعین
اسیر شام ومدینه غزالیم قارداش
ئوزوم علی قزی یاسلی عزالیم قارداش
دیار کوفه وشام وحلب مسافریم
ایاقه دور نجه گور ماجرالیم قارداش
گیدوب جلالیم الیمدن حسین باشیم آغاروب
دینمورم نجه باشی بلالیم قارداش
سزادی دولسا نوائیله نینوا دشتی
من آغلیاندا-که نی تک نوالیام قارداش
اسفلی شکوه لریم واردی مخبر شامم
شکسته دور ئورگیم نینوالیم قارداش
گیدنده نعشیوی عریان قوم اوسته گورموشدوم
کفنسیز اولماقیوا دفن-حالیم قارداش
ئوزون بلوردون اوگون باشدا معجریم یوخودی
او عذرین ایندیده غرق ملالیم قارداش
یارالی گون قاباقیندا سنی قویوب گیتدوم
هله او گیتماقین افسرده حالیم قارداش
خانملیق ایلدیقیم کوفه ده نلر گوردوم
باشون گوروردی نجه ابتلالیم قارداش
یارالی باشیوی شمر ایتدی بیر گجه مهمان
اودور بیر عمریدی گریان لیالیم قارداش
گلنمدیم اوگجه من یانان چادردیدیم
آنامدا گوردی نه سوز خفالیم قارداش
سنون یرون اوگجه خیلی نامناسبیدی
اودور من ایندیده رنج و عنالیم قارداش
صباح اولاندا باشون پیشوازیمه گلدی
بلوردی مملکت عشقه والیم قارداش
گلنده سن دانوشوردیم کجاوه ده گوردون
که نطقده نجه حیدر مثالیم قارداش
دیردی کوفه لیلر مرتضی علی دانیشور
اودور دئدیم او علینون من آلیم قارداش
اوزینبم منی گون گورممیشدی بی پرده
هامی بولوردی آنام تک حیالیم قارداش
سنون محبتون ائتدی اسیر سالدی چوله
محبت عالمینون مه جمالیم قارداش
هارا گیدوب باشون آردینجا گئتمیشم منده
مقام عشقیده باخ گور وفالیم قارداش
آپاردی مجلس عامه بیزی زیاد اوغلی
گوره گوره باشی قاندان حنالیم قارداش
اسوبدی باخمادی گلزاریمه سموم خزان
تصور ائتمدی عصمت نهالیم قارداش
دانیدیروب منی ووردی دوباره دیل یاراسی
بیان ما وقعه نطق لالیم قارداش
باشون دالینجا دوشوب شامه گیتمیشم بیر باش
رموز عشقده مجنوندان عالیم قارداش
وروبدیلار او قدر تازیانه کعب سنان
هنوز جسمیمه باخسان یارالیام قارداش
دولانمیشام باش آچیق شامیده محله لری
خیال ائدردی گورن لاابالیم قارداش
گیرنده شامه منه نامناسب آد دیدیلر
بوله بوله که پیمبر عیالیم قارداش
دولاندیریردیلا کوچه به کوچه قول باغلی
خیال ائدردیلر چین و خطالیم قارداش
توکردیلر باشیما کول دویردیلر بی جرم
گمان ائدردیله جرم وخطالیم قارداش
گونوم او شهریده بختیم کیمی دونوب شامه
اگر چه شمس حیا-مه لقالیم قارداش
باشیمدا قمچی یری معجریم کیمی قرالوب
ایکی قرائیله باشی قرالیم قارداش
پوزوب خیالیمی بیر نحویله خرابه غمی
دینمورم بوقدر وار خیالیم قارداش
اوقدر صبر ائلدیم صبر مندن اولدی ملول
بو یولدا گورنه شهامت نمالیم قارداش
دایانا بولمدیم اما یزید بزمینده
سبب اوبزمیدی چوخ غمفزالیم قارداش
اگر اومجلسین اوضاعینی {{حسینی}} یازا
اونا بیوک صله ویرم سخالیم قارداش
امان یزیدین الیندن امان یارالی امان
یارالی قلبیمی ایلوب او شرب مجلسی قان
سنون دوداقلاروی چاک چاک ائدنده آغاج
یاخامی پارچالادیم اولدی طاقتیم تاراج
یارالی باشیوه گه باخدی گولدی ایچدی شراب
گه ائتدی قانه دونن قلبیمی ستمله کباب
قمار اویناماقا اولدی کفردن طالب
باشوی دوگدی اولاندا حریفینه غالب
یارالادی دوداقون خیزران اومجلسده
منیم سرشگ تریم اولدی قان او مجلسده
اوقدر صبر ایلدیم تنگه گلدی مندن صبر
ولیک غم منه ویردی تکان او مجلسده
یاخامی چاک ائله دیم من معاویه اوغلی
ووراندا لبلریوه خیزران اومجلسده
کنیز ایستدی بیر سوگلی قیزون شامی
یوزومه خون دل ائتدیم روان اومجلسده
دلیل عقلیله آیات نص ومحکمیله
یزید کفرینی ائتدیم عیان اومجلسده
اولیدی کاش قلج الده قارداشیم عباس
منه دینده او ظالم یامان اومجلسده
نه دل یاراسی منیم ووردی قلبیمه گوردون
که چکدی اهل حرم الامان او مجلسده
باخوب عیالیوه بیر بیر سوروشدی آدلارینی
بیزه شماتته آچدی زبان او مجلسده
شراب مجلسی پیغمبر عترتی باش آچوخ
ویروب عیالون عجب امتحان او مجلسده
قویولدی خارجی آد جدیمی نشان ویردیم
ترحم ائتمدی اسلامیان او مجلسده
بنی امیه نی قرآنیله مجاب ائتدیم
گلوب مروته انجیلیان او مجلسده
او مجلسین ستمین {{سعدی زمان}} یازما
اولوب علی قیزی قدی کمان او مجلسده
🍁🍁🍁🍁🍁🍁🍁
