زبانحال حضرت زهرا س
عم اوغلی آز قالور حسرتله زهرا سندن آیریلسون
دویونجاگل گوروم ،بیرآز بو حسرت مندن آیریلسون
آتام پیغمبر رحمت گیدن گوندن بو دنیادن
عم اوغلی اولمادی قلبیم رها درد و بلایادن
گونوز تاریکتر اولدی منه بیر لیل یلدادن
ببر آنی اولمادی اشکیم منیم دامندن آیریلسون
بهار عمریمه چون صرصر جور و جفا اسدی
حیاتیم رشته سین آخرده مقراض ستم کسدی
مفصل دردیمی مجمل دیسم بیر کلمه ده بسدی
قاپوم یاندی، سبب اولدی که زهرا سندن آیریلسون
سقیفه اهلینون هر نه واریدی ظلم پیکانی
منیم بو سینمه ووردی عم اوغلی واردی برهانی
او گوندن حقوی داندی سنونکه اول و ثانی
من اولدوم باغریقان گون اولمادی غم مندن آیریلسون
بولورسن سن نیه عجل وفاتی حقدن ایستردیم
سنی گوردوقجا مظلوم اولموسان بی حد غم ایلردیم
داخی بیر چاره تاپمازدیم مناجتیمده سسلردیم
قوتار زهرانی یارب غملی مسکندن آیریلسون
نه مدتدور سنیله همدمم ای شاه خیبر گیر
بو مدتده سنه چوخ دردسر ویردیم من دلگیر
اگر چه خدمتونده اولمیوب گر اولسا بیر تقصیر
حلال ایله که چوخ آز قالدی روحیم تندن آیریلسون
حضورینده چوخ عرضیم وار دیم گرچه جسارتدور
قبول ایله وصایامی عمل ائت گر چه زحمتدور
گیجیله غسل ویر دفن ایله گزلین چونکه خلوتدور
مبادا خواب غفلت دیده دشمندن آیریلسون
عم اوغلی باغریمی قان ایلینلر باغریقان اولسون
گوزومی دولدورانلار اشگیله دایم گوزی دولسون
منیم گلزاریمی سولدوردی هرکس گلشنی سولسون
روادور فصل گل زهرا بیله گلشندن آیریلسون
اگر چه آغلورام آیریلماقا سندن مسلمدور
ولی چوخ آغلادان مت بی نوانی اوزگه بیر غمدور
مجسم چون گوزومده عاشر ماه محرمدور
حسین یالقوزدی ایستر عترت ذوالمندن آیریلسون
نه آیریلماق ؟ نجه عرض ایلیم، دل التهاب ایلر
بو آیریلماق دل زهرانی جنتده کباب ایلر
بالا گورسه آتا عزم ایلیوب ئولماقا، تاب ایلر؟
نجه بو حالیله دوزسون ایله مامندن آیریلسون؟
دوتوبلار دامنیندن عترت سلطان مظلومان
سپهر داوره اوج ایلور هر دم ناله و افغان
نه احواله قالوبدور شه بولر بیر خالق منان
تصور ائت او حالیله نجه شیوندن آیریلسون
گلوب بو درگهه(سائل) النده نوحه عنوانی
بسان مور، چون سن سن سلیمانلار سلیمانی
امیدیله گلوب رد ایتمه مایوس ای کرم کانی
دم محشرده لطف ایله صف دشمندن آیریلسون
