احوالات حضرت زهرا س
اگلش باشیم اوستونده عموغلی وئرورم جان
قرآن اوخی ای ناطق قرآن سنه قربان
الله سوزونی سندن ایشتماق نه گوزلدی
جان اوسته نظر حسنوه ایتماق نه گوزلدی
مدتدی سنه همسرم ای خسرو خوبان
بو مدتدی قیلدون منه الطاف فراوان
گل بیرده منه لطف وکرم قیل سنه قربان
گوگلوم غمین آل رفع ملال ایله عم اوغلی
زهرادی کنیزوندی حلال ایله عم اوغلی
چوخ عمر دیردیم منه لطف ایلیه الله
بو عمری سنه خدمته صرف ایلیم ایشاه
افسوس که تیز ایلدیلر عمرومی کوتاه
ناحق یره ظلم ایتدیی منه اول و ثانی
الدوردی منیم محسنیمی سقط زمانی
درک ایلیه لی محضروه فیض تشرف
اولموب که اولا حضرتوه عرض تکلُّف
بو آیرلیقا غم یمه چوخ ایتمه تأسف
فرض ایله که زهرا یوخوموش دار فناده
یا بیر گولیدی سولدی گلستان وفاده
هرچند که گلشنده کی گللر گلیم من
بو فخز منه بسدی سنه سویگلی یم من
خار ستمون حیف اولا خونین دلیم من
گللر بوله جاق نسگلمی خار آراسندا
بلبلده غم حسرت دیدار آراسندا
مندن صورا گلشنده آچار سوسنی گللر
ایستر بوله لر صورتی سوسن منی گللر
گتسن چمنه گورسله من سیز سنی گللر
انصاف ایلموب باخماسا نرگس گوزی حسرت
نه یوزله بنفشه یره تیکمز رخ خجلت
غصب ایتدی سنون حقّویله ملکیمی دشمن
غملندیم اوتوروم ایلدیم ناله و شیون
تا رخصت آلوب حقّوى اثبات ایلدیم من
مسجدده گیدوب ایلدیم حق سوزلری اعلان
طغیانینه بوبکر اوزیده اولدی پشیمان
گوردوم کمکون یوخ سنون ای شاه ولایت
هر کیم یتیشور ایلوری بیر نحو اهانت
ایفای وظیفه ایلیوب ایتدیم اعانت
واجب بولوب اثبات ایلدیم حقّی چالشدیم
ناچار قالوب خلق آرا مسجدده دانشدیم
اثبات ایلدیم حقّوییی جانلار سنه قربان
ثانی منیم حق سوزلریمه تاپمادیی برهان
کسدی یولومی آچدی ال اول دشمن قرآن
آی تک یوزومی سالدی خسوفه او ستمکار
اولدوم او زماندان من عم اوغلی بیله بیمار
الطافوه چوخ شایقم ای شمس هدایت
وی سایه سی عالم لر آرا سایهء رحمت
دوشسه باشیما لطفویله ظلّ عنایت
عرشه اوجادار باشیمی ای روح روانیم
ای عالم آرا روح روان و دل و جانیم
سایَن نه گوزل سایه دی ای سرور دوران
ساینده سنون دالدالانور عالم امکان
سالسان باشیما سایه وی ای سایهء رحمان
بو سایه چوخ عزّت اولی زهرایه حبیبیم
گر چه سالارام چوخ باشا من سایه حبیبیم
آند ایچمرم اول جانه اولا نقص ارادت
سوگند اولا اول خاکه که کویونده دی تُربت
قلبیمده سنه موج ویرور مهر و محبّت
بیر جوهرهء مهر که اوندا عَرَض اولماز
دنیا هاموسی مهر اولا اونلا عَوَض اولماز
(ذهنى) نه گوزل تاپموسان عالمده سعادت
بو تاپماقوا باعث اولوب خالق عزّت
یاز بو سوزیی زهرا دیدی ای شاه ولایت
الله سوزونی سندن ایشتماق نه گوزلدی
جان اوسته نظر حسنوه ایتماق نه گوزلدی
