حضرت عباس

قلم ایدر گینه طرز کلامی بوردا عوض

قلم اولان قولا یعنی که آغلاماقدی غرض

چخوب فراتدن اوز قویدی خیمه گاهه طرف

کسوب قباقنی دوت مین نفر شریر طرف

چکوبدی نعره آلوب غیظیله اَله شمشیر

آتاسی شیر خدا تک او چور شاه نجف

ایشتدی نعره سینی خیمه گاهیده بالالار

او تشنه دللّره یوز ویردی بو سَسیله شعف

باخوردی زینب کبری گوزی حسین یوزینه

گوروب سارالدی سولان گل کیمی او کان شرف

دیدی نه وار مگر عبّاسی یخدیلار آتدان

چالوّلا طبل بشارت گلور ترانۀ دف

بیوردی باجی سلامتدی قارداشیم امّا

قلج آلوب صولا اول قُلزم هنرده صدف

دوشنده بیر قولی عبّاسون ای امام زمان

حسین بیله پوزولور یوز ویرور بو حال اَسف

نه چکدی بُلمَم او دم که گلوردی سرعتیله

گوروب دایاندی آدی ذوالجناح اوزی رف رف

باخوب نه گوردی که یرده ایکی کَسوک اَل وار

تأسّفیله او مظلوم ویردی بِربِره کف

گوتوردی قوللّاری بر اوپدی باغرینا باسدی

او قدر قالمادی اولسون قوای جسمی تَلَف

اوجالدی شیونی سهم و صلابتی چوخالوب

گوروب او صولتی دشمن فرار ایدوب صف صف

یتشدی بیر یره گوردی یخوبلا قارداشینی

آلوبلا دوره سین اون یدّی بی حیا و شرف

داغتّدی دشمنی گوتدی تُراب ذلّتدن

آلوب باشین دیزی اوسته ابوترابه خلف

پیمبر اوغلونون احوالینه او ساعتده

چکوب سَس آغلادی یکسر پیمبران سَلَف

عجبدی یانمادی افلاک حسینون آهندن

که سُوز اولاندا اورکده اولور چوخ آهده تف

گوروب بدن دولوسی نیزه دور قلج خنجر

علاوه سانسیز اوخا سینه سی اولوبدی هدف

دیدی بو گُلدی که خندان اولوبدی بر دسته

و یا دوشوب یره اوراق اولوبدی بر مُصحف

چَکوب کناره نچه اوخ او گل عذاریندن

یولالّا اولسا گر اطراف گلده خار و علف

آچوب گوزین دیدی ای کربلا سلیمانی

غلامیدیم سنه ایتدون حساب بیر آصف

بو حالتیمده مُشرّف بیوردون ایتدون یاد

که ای باباسی هامی انبیالره اشرف

یوخومدی تُحفۀ قابل ولی قبول ایتسن

نثار مقدموه بر حقیر جاندی به کف

قصور خدمتمدی عفو ایله بو گون سَندن

خجالت ایتدی منی بو گروه مستضعف

بو آرزونی ایدر «شأنی» ای شه ذیشأن

اُلَن زمانیده اولسون یری زمین نجف

🌸🌸🌸🌸🌸🌸🌸🌸🌸