حضدت رقیه س

کنج خرابه بو گجه رشک جناندور عمّه جان

لطف ایلیوب بابام گلوب،یاتما اویاندور عمّه جان

__________◾◼◾__________

بخت منیله یار اولوب، عمّه نه خواب نازدور

رحمت حق باز اولوب، باب امید بازدور

گل آچیلوب بهار اولوب، نغمه ی وصلِ سازدور

فصل وصال گُل یتوب، ختم خزاندور عمّه جان

__________◾◼◾__________

گرچه بیزیم ازل کی گون یتدی خزانه باغیمیز

جمله عزالی یاسلیوخ، واردی اورکده داغیمیز

منزلیمیز خرابه دور یوخدی اگر چراغیمیز

دلده کی شمع آهیوی بو گجه یاندور عمّه جان

__________◾◼◾__________

عشق معاملاتینون نفعی که وار ضررده دور

خوشدی منیم هلاکتیم، جان دیمورم خطرده دور

سن که دیردون هِی منه عمّه بابام سفرده دور

گلدی غریبه وقتیده یاخشی زماندور عمّه جان

__________◾◼◾__________

ایمدی خلاص ایدر منی طعنه ی اهل شامیدن

فارغ ایدر شماتت فرقه ی بد مرامیدن

لیک دیمه بابامه سن قصّه ی بزم عامیدن

طبع غیورینه بو غم خیلی گراندور عمّه جان

__________◾◼◾__________

گرچه یتوردی حق منی دلده کی اشتیاقیمه

لیک چوخ اولدی خجلتیم یتدی کدر قوناقیمه

چکدی الینی باشیمه باخدی قابار ایاقیمه

آغلادی،یاندی،سویلدی بو نه نشاندور عمّه جان

__________◾◼◾__________

ایستدیم اوزعزیزه سین، صورتی نیلی گورمه سین

هی وورولوب دوگولماقین واردی دلیلی گورمه سین

یعنی یوزومده شه گوزی نقشه ی سیلی گورمه سین

اولمادی گیزلدنمدیم گوردوم عیاندور عمّه جان

__________◾◼◾__________

باخدی کبود عُذاریمه،آغلادی منده آغلادیم

یاندی بو حال زاریمه،آغلادی منده آغلادیم

یار اولوب آه و زاریمه،آغلادی منده آغلادیم

سنده یری وار آغلاسان، جای فغاندور عمّه جان

__________◾◼◾__________

شمر شریر و شومیدن واردی دیمم شکایتیم

راه وفاده بهره مند ایتدی منیم ریاضتیم

گوردوم آتامی بیر نظر قالمادی دلده حسرتیم

جان ویرم آزدی وصلینون قیمتی جاندورعمّه جان

__________◾◼◾__________

ایتدی وفا آتا بالا مهرین آتام ایتیرمدی

داغ فراقی سینه دن من دیمورم بیتیرمدی

حیف که تک گلوب اوزی اکبریمی گتورمدی

بولمور علی علی منه ورد زباندور عمّه جان

__________◾◼◾__________

نچّه زماندور حسرتم عارض و خطّ و خالینه

کاش اونوندا بیر زمان عمّه یتم وصالینه

بیرده بو گوزلریم دوشه اکبریمون جمالینه

قالماز اورکده هر نه که درد نهاندور عمّه جان

__________◾◼◾__________

جان ویرورم گلون گلون من دیمورم که یاندیرون

مرگیمون علّتینی بو رمزیله خلقه آندیرون

شمع زفاف اکبری قبریمون اوسته یاندیرون

باغریم او حسرتیله چوخ لخته ی قاندورعمّه جان

__________◾◼◾__________

چاره قیل آز قالور چخا مرغِ دل آشیانه دن

گلسه دوباره شه دیمم درد و غم زمانه دن

بیرده شکایت ایتمرم زحمت تازیانه دن

دور دولاناخ بابامی تاپ آز منی یاندور عمّه جان

__________◾◼◾__________

آلسا خبر مشقّت و زحمت و رنج راهیدن

گیزلدرم پیاده لیق زحمتینی او شاهیدن

قلبینه یتمه سین کدر باری بو بی پناهیدن

سن بولوسن بو مدّتی چوخ نگراندور عمّه جان

__________◾◼◾__________

بیر در خانقاهیده بیرق فقر اوجاتمیشام

بالش استراحتین فکرینی باشدان آتموشام

اینجوری جسم وجان زبس بو قوری یرده یاتموشام

سهلیدی جای قمچیدور، کعب سِناندور عمّه جان

__________◾◼◾__________

خون دلیله گوزلریم عمّه نه نوع دولماسون

من کیمی هیچ عزیزه نین گلشن عیشی سولماسون

هیچ آتاسی اُلَن بالا دشمن اسیری اولماسون

ذلّتی وار، اسیرلیق دردی یاماندور عمّه جان

__________◾◼◾__________

کیم گوروب عمّه کیم بیله کامین آلا خرابه ده

لیک جهاندا جان ویروب هانسی بالا خرابه ده؟

شه گله شاهزاده نی یاده سالا خرابه ده

لایقی شاهزاده نین بیله مکاندور عمّه جان؟

__________◾◼◾__________

بیرده بو جانه بولموشم دگمیه جاق نسیم یوم

بیله مقدّرات اولوب من بو مکاندا دفن اولوم

یعنی دوباره یثربه دوشمیه جاق منیم یولوم

گرچه گیدن سیزیله بو روح و رواندور عمّه جان

__________◾◼◾__________

باجیلاریم گرک گیده شهر و وطن دیارینه

سن دُشننده جدّه میز فاطمه نین مزارینه

درد دلین دیر هامی جدّ بزرگواریمه

من که یوخام، بو حالیمی سن اونا آندور عمّه جان

__________◾◼◾__________

ایله شفیع رقیّه نی « شانی » اولونجه آغلا، تا

خالق حق بغیشله سین هر قدر ایتموسن خطا

ایلدی ثامن الحجج مطلع شعریوی عطا

کنج خرابه بو گجه رشک جناندور عمّه جان

  ______________◾◼⬛______