وداع امام حسین ع
گینه الیمده قلم باشلیوب شکایتدن
ائدور منی ولی شرمنده بو حکایتدن
ازلده معذرت ایستر دلیم احبادن
خصوص او کسکه ورار دم همیشه الفتدن
سنیله یوخدی رجوعیم زبانحالیله
مخاطبیم اوزومم اینجمه بو صحبتدن
گیجه گونوز اوزوم اوز نفسیمه خطاب ائدرم
سبب ندور چخوب اشعار معنویتدن
وئرور جواب که بو علم شعر معناده
او نکته دور که مبرهن اولار کتابتدن
معلمیم منه اورگتمیوب عروض و بدیع
الیم دلیم قلمیم ایچمیوب او شربتدن
نه لف و نشر مشوش نه قلب بولم من
و نه موشحه دارا ائدوب بخالتدن
نه رد العجز علی الصدر ائیلیوب تعلیم
نه مستراد و جناس اورگدوب صعوبتدن
نه سجع و قافیه بولم نه شایگان نه روی
نه فن شعریده منظور اولان کتابتدن
او سوز که من یازارام لطف حی یکتادور
ائدر لسانیمه جاری اوزی عنایتدن
او قدر ایستمیرم مطلبیم مطول اولا
بو شرح حال کفایت ائدر شکایتدن
گوزوم حسینون همان ساعتین مجسم ائدوب
علاقه سین کسه ایستور عیال و عترتدن
یغوب بالالارینی باشه شهریار انام
وداع آخر ائده اهلبیت عصمتدن
بیرین آلاردی قوجاقه سیلردی گوز یاشینی
گورردی غصه سالوب گول یوزون طراوتدن
چکردی رافتیله ال بیریسینون باشنا
باساردی جان کیمی آغوشینه شفقتدن
بیرین اوپردی ویرردی بیرینه دلداری
محبتیله سرشکین سیلردی صورتدن
باجسی زینبی گوردی که حالی چوخ پوزولوب
بولود کیمی دوتولوب شدت مصیبتدن
دولوبدی کاسه چشمی سرشک آلیله
توان و طاقت آلوب صبر. او کان عفتدن
او قدر قالموری روحی بدندن آیریلسون
نفس شماره دوشوب درد بی نهایتدن
قویوبدی قلبینه اول ساربان کسن الینی
که قلبی ساکت اولا اضطراب و وحشتدن
دوتوب او حالیده درگاه کبریایه یوزون
بیر التماس ائیلدی درگه جلالتدن
ددی خدا باجیما صبر وئر بو محنتده
که تا آزالمیا صبری ملال و محنتدن
اوزیده وئردی تسلی او شاه زینبینه
بویوردی ایتمه بیله ناله درد فرقتدن
هانی آتام هانی جدیم هانی آنام زهرا
گیدوبله دار بقایه بو دار ذلتدن
هامی یارانمش اوچون وار اولوم محققدور
بو حق مشیتیدور ابتدای خلقتدن
محالیدور قالا بیر ذیحیات دنیاده
اولوبدی جاری ازل گونده کلک قدرتدن
بو گون منیده بو قوم اولدورر ولی صبر ائت
مجاز اهلی گرک آیریلا حقیقتدن
وداع قیلدی تمام اهل بیتینی بیر بیر
ویروب تسلی دل تک تکینه رافتدن
گلوب تکلمه زینب دیدی حسین قارداش
اگر چه معذرتیم واردی بو جسارتدن
ایکی بالا قالوب اوچ گوندی خیمه ده عطشان
هر ایکیسینی سوسوزلیق سالوبدی طاقتدن
اولار گلمدیلر محضر مبارکیوه
خیمده غش ایلیوب شدت حرارتدن
زبس بو نقطه اثر ایتدی شاه مظلومه
آپاردی صبرینی سالدی دیزینی قدرتدن
همان خیامه گلوب شهریار بی غمخوار
ولیک دوتموشدی اود یاناردی حسرتدن
امام سسلدی هر تک تکین یانان دلیله
جواب گلمدی اولدی ملول او حالتدن
اوتوردی تا یره ویردی یواش یواش حرکت
چکوب بهشتیده ناله بتول او ساعتدن
گوروبدی هر ایکسی جان وئروب سوسوزلقدان
فرات تک یوزه گوز یاشی آخدی رقتدن
تمام مستحب و واجبه امام حسین
او گون عمل ائیلدی شیوه عبادتدن
مریض عیادتی چون مستحبدور شرعا
خصوص امام اولا افضلدی هر فضیلتدن
عیادت ایتماقا بیمار خیمه سینه گلوب
گوروب مرض ائله جسمین سالوبدی حالتدن
گل جمالی سولوبدور بدن ائیله اریوب
محالدور تاپا تشخیص جسمی صورتدن
گینه او حالیله گوردی پیمبر اوغلی گلوب
ایدوبدی لازمه احترام حرمتدن
سورشدی حالینی عرض ایلدی که یا ابتا
بو گلماقونلا وجودیم دوشوبدی زحمتدن
بویور گوروم هارا یتدی ایشوز بو قومیله
دیدی بو قوم اوغول چخدلار طریقتدن
زبس که شعله ور اولدی بو چولده آتش جنگ
اولوب مصمم جنگ اهل کین عداوتدن
شهید ائتدیله بیر جمع بیزدن اهل عناد
بیر آزدا قتله یتوب فرقه شقاوتدن
دئدی بابا نیه گلمور عموم عیادتیمه
دئدی الیم اوزولوبدور او سرو قامتدن
که یعنی قارداشیم اولدی پوزولددی پرگاریم
علم یاتوب قوشونوم دوشدی استقامتدن
دئدی بابا بس عموم اوغلی قاسمه نه گلوب
بویوردی دوغرادیلار بند بند ضربتدن
ستمله دوندروب اهل جفا طویون یاسه
باخوب او حالته یاندی عروسی حیرتدن
دئدی بابا هانی مسلم هانی بریر و حبیب
بو گون اولاردا کسوبلر ایاق عیادتدن
دئدی سورشما اولاردا اوغول شهید اولدی
اولوبلا مست هاموسی باده شهادتدن
دئدی بابا نیه بس اصغرون سسی گلمور
مگر سالوبدی سوسوزلیق او طفلی طاقتدن
و یا ایچوبدی سو سیراب اولوب یاتوبدی بابا
وجودی راحت اولوب قورتولوب ملالتدن
بویوردی اللریم اوسته او طفلی اوخلادیلار
اورگیم او دوتوب اودلاندی بو مصیبتدن
دئدی بابا هانی بس قارداشیم علی اکبر
بویوردی که خبر آلما او ماه طلعتدن
دئیوم صریحینی تا قالماسون سنه مستور
که اولدروب هامی انصاریمی سپاه شرور
تمام خیمه ده قالموب ذکوریدن بیر کس
که سسلینده اوغول تا سسیمه ویرسون سس
بو سوزده سید سجاده یوز ویروب رقت
اورکده محنتی آرتوب غمی ایدوب شدت
بویوردی زینبه ای عمه ائیلمه تاخیر
گتیر گیلن منه سن بیر عصا و بیر شمشیر
کمال حزنیله عرض ایتدی زینب نالان
عصائیله قلجی نیلوسن سنه قربان
بویوردی گورموسن ای عمه فرشته مقام
قالوب بو چولده کمکسیز امام کل انام
ایشتدی بو سوزی سلطان تشنه لب یاندی
دوتوب شراره وجودی اورکدن اودلاندی
بویوردی زین العباده او شاه بخشش و جود
سنون شهادتیوه ویرمیوب رضا معبود
منیم یریمده وصی سن ولی یکتاسن
تمام ماخلق اللهه حکم فرماسن
اگر سن اولمیاسان چرخده مدار اولماز
بو عرش و فرش و عوالیمده بو قرار اولماز
گرک عیالیمه مندن صورا پناه اولاسان
تمام عترت اطهاره دادخواه اولاسان
سنون وجودیویله برقرار اولور عالم
قالا محالیدی عالم امامیسیز بیر دم
شرار قلب امامی امام سوندوردی
تمام ماوقعی سربسر بولوندوردی
امامت امرینی تفویض قیلدی بیماره
وئروب تسلی دل واقف ایتدی اسراره
یانان دلیله ایدوبدور وداع باز پسین
بیر آیری خیمیه تشریف آپاردی سرور دین
چاغردی زینبی ایتدی قضیه دن حالی
بویوردی خیمه نی قیل اهل بیتدن خالی
به امر سرور دین زینب فرشته مقام
او خیمه اهلین همان خیمه دن چخاتدی تمام
امام گوردی داخی یوخدی بیر نفر مانع
دئدی ایشیت سوزومی باجی اول گیلن سامع
بئله ائتورمه اوزون توکمه اشک تر یوزیوه
بو قدر آغلاما صبر ائت تسلی وئر اوزیوه
باشیوی آچما یوزه وئرما ایلمه افغان
زمان ناله دگول صبر قیل دایان باجی جان
نه یول ساچون نه هله صبر ناقه سین پیله
یوزون خراش ائلمه نه دئسم قبول ائیله
سنون یانوندا باجی بیر پارا امانت وار
گتور گیلن منه میراث انبیادی اولار
خصوص بیر نچه سی عین مدعادی باجی
بیری عمامه پیغمبر خدادی باجی
بیریسیده اولارون ذلفگاریدور آتامون
بو گونکی گونده منه یادگاریدور آتامون
بیریده باجی او کوینکدی که آنام زهرا
اوزی درست ائلیوب مندن اوتری یا اختا
بویوردی گر چه سنه زحمتیم چوخ اولدی منیم
سنیله زایل اولور لیک دلده کی محنیم
نئجه که درد و غمیمده شریک اعظم سن
او نوع بعضی زمانی سوزومده محرم سن
علاوه ائت اونا بیر جامع مندرس اولسون
بو سوزده وار یری زینب رلفینی یولسون
فغان ائده ائده زینب سورشدی حکمتینی
او کهنه کوینکین اول شه بویوردی علتینی
بنا به امر همایون سرور بطحاء
اوزونی پوزمادی ظاهرده زینب کبرای
گتوردی زینب او که لازمیدی اول شاهه
وئروب او غصه لی موقعده حجته اللهه
گیوبدی اگنینه اول او کهنه پیرهنی
آناسی فاطمه نون آتدی غصه و محنی
گیوبدی قامت موزونه رزم جامه سینی
باشنا قویدی رسول خدا عمامه سینی
بلینه باغلادی هم ذالفقاری شاه جهان
حمایل ایلدی قران او ناطق قران
قتال لشگر بیداده اولدی آماده
دولاندروب گوزینی زینبه او اثناده
گوروب که آز قالوری روحی جسمیدن چخسون
حصار محکم صبرین هجوم غم یخسون
شکسته گوگلینی لازمدی زینبون آلسون
غم فراق مبادا هلاکته سالسون
سرشک دیده سی هر ایکی گوزده پیدادور
بولود کیمی دوتولوب یاغماغا مهیادور
بولوب بو نکته نی ایام هجرینه توشه
عزیز باجیسینی باسدی جان تک آغوشه
هر ایکی قلبین او دم مهر چشمه سی داشدی
باخوب بیری بیرینه بیر دویونجا آغلاشدی
کمال رافتیله پادشاه کل انام
وئروب تسلی دل زینبی ائدوب آرام
چخاندا دشره خیمدن او شاه حل و حرم
کناره خیمه ده دورموشدی بانوان حرم
قیاس اولونماز او عالم نجه بیر عالمدی
اوشاق بویوک هاموسی انتظار مقدمیدی
تمامیسی الی قوینوندا واله و حیران
همان خیامه تیکوب گوز باخوردلار نگران
امامتین گونی شرق خیامیدن او زمان
طلوع ایلدی آردیجا زینب نالان
باخاندا حال شه تشنه کامه آل الله
اوشاق بویوک هامی مطلبدن اولدولا آگاه
وداع آخریدور بولدولر شه حرمون
گلوبدی جوشه غمی بانوان محترمون
گوروبله بیرده او شه خیمیه قایتمیه جاق
فراق اسیرلری وصله بیرده یتمیه جاق
تمام قتله یتوب آل هاشم و انصار
به غیر سرور لب تشنه قالمیوب غمخوار
اولار که اولموشدی سوزش دله قانع
اولانمادی داخی بیر کیمسه اشکینه مانع
گورنده بیر بئله احوالی اوندا آل الله
صدا صدایه ویروب سسلنوبله یا الله
اوشاق بویوک هاموسی سر بسر عیال امام
گلوبله شیونه گویا قیامت ایتدی قیام
اولوب معاینه آل پیمبره محشر
بالالارون آنالار بوشلادی او دم یکسر
مخدرات حرم مضطرب پریشانحال
آلوبلا ماه وفا دوره سینی حاله مثال
گلوبله نی کیمی فریاد و داده آغلادیلار
او سرورین یولونی گوز یاشیله باغلادیلار
بیری دوتوب اتگیندن ملال و محنتیله
بیری اوپردی الیندن کمال حسرتیله
بیریسینون بوئی چاتمور اوپه دوداقیندن
دوشور قدملرینه تا اوپه ایاقیندن
بیری سالور آتینون بوینونا ایکی قولونی
بیرسی چاره تاپانمور کسور گئدن یولونی
ائیله سزلدادلار ائتدیلر ائیله ناله
امام اوزیده باخوب آغلادی اواحواله
سیله سیله گوزونون یاشینی او تشنه جگر
باجیسی زینبه ایتدی خطاب اول سرور
آنام گوزتلوری زینب یوخومدی وقت و مجال
اماندی گل منی بو قیزلارون الیندن آل
امام گوردی گئدوب اهلبیتیدن آرام
وئروب تسلی اوزی ائیلدی اوشاقلاری رام
باخوب بویوکلره بیر نوع ویردی امر سکوت
چکیلدی بیر طرفه دوردلار هامی مبهوت
اوزی ولیک دوباره او شهریار غریب
محبتیله ائدوب اوز وداعینی تعقیب
دوتوب بالالارینون بیر به بیر اوپردی یوزین
چکردی باشینه ال بیر به بیر سیلردی گوزین
دوشوب او حالده ناگه رقییه نظری
گوروب چوخ ائیلوب اثر نار هجرنون شرری
توگور سرشک گوزوندن مثال ابر بهار
باخور یانور اونا آغلور تمام خورد و کبار
تیکوبدی حسرتیله هر ایکی گوزون گوزینه
گلور نوایه ورور گه باشا گهی یوزینه
زبس موثر اولوب شاه بی کسه حالی
توکوب سرشگینی گوزدن پوزلدی احوالی
گوربکه ایللریله توش اولور فراقینه
اوپوپ یوزوندن او طفلین آلوب قوجاقینه
