اربعین حسینی
شاماتی گزوب دیده خونباریله گلدیم
قبر اوسته گلن دسته زواریله گلدیم
عالملری حیرتده قویوب پایه صبرون
زینب سنه قربان نیه شش گوشه دی قبرون
اول علی اکبر قانینی قانوه قاتدون
باشسیز بدنون صونرا باسوب باغریوا یاتدون
بو یاتماقیلا بیرق اسلامی اوجاتدون
طوبی آغاجندان آسیلان خوشه دی بو قبر
بولدوم باجون السون نیه شش گوشه دی بو قبر
هر چند گل یاس قویولموش اطاقوندا
بیر گلبن نوخیزده واردور قوجاقیندا
قرمزی شکوفه آچیلوبدور بوداقیندا
قبرونده نهالان بهشتی گل آچوبدور
آرتوق دیمورم اصغروون رنگی قاچوبدور
باشون بدنون معجزه شام و دمشقون
گوستروردی اخا پختگی شیوه مشقون
اما نه بیوک معجزه دور وحدت عشقون
بو قبره ایکی نور گرانمایه دوشوبدور
شاخه ایکی اما یره بیر سایه دوشوبدور
بو مرقده وار حسرتی جنات نعیمون
جنت باغنا درس وفا ویردی حریمون
خوش حالیوه خوش صحبت و خوش خودی ندیمون
باس باغریوا جانانوی زیبادی جواندور
عالم گوره بو قبرده گلخانه جاندور
قیرخوندی عیالمون هامی قبر اوسته گلوردی
غم خسته سی بیر دسته برجسته گلوردی
بو دسته حسینی لره وابسته گلوردی
منده قاریشوب اونلارا قبر اوستنه گلدیم
امیدیمی هر یردن اوزوب بیر سنه گلدیم
ایکاش الوب تپراق اولوب مدفن اولیدیم
پیراهن گل تک سنه پیراهن اولیدیم
بیر سن بو مزار ایچره اولوب بیر من اولیدیم
اول سر ژگانیله بیر قبر قازیدیم
باش داشنه تاریخ ره شامی یازیدیم
ای قبر مطهر نه عجب روح فزاسن
شمع شب وصل و نفس صبح صفاسن
غرق عرق پیکر شاه شهداسن
ای عود غم آلود یانان عطروه قربان
ای صفحه قرآن یازیلان سطروه قربان
ای سایه حق لطف خدا کعبه آمال
ای قوت دل راحت جان شاهد اقبال
ای کان کرم یات قوری تپراقده خوشحال
یاتمش سان اگر صورت ظاهر قوری یرده
غم یوخ که یاتار گنج و جواهر قوری یرده
روحون کیمی وارسته و آزاده دی قبرون
قان آغلیوب آغلاتماقا آماده دی قبرون
باغرینده یاتان دلبره دلداده دی قبرون
ریحان خطیله کاتب سرمشق حسینی
قبر اوسته یازوب مدرسه عشق حسینی
ای باغ بهشتی گل و گلزاروه قربان
ای غنچه تر عقده گشا خاروه قربان
ای قصر ممرد در و دیواروه قربان
قارداشیمی آهسته چک آغوشوه ای قبر
بیر مونسی وار چکمه تک آغوشوه ای قبر
هرچند عزیز خاطریوه باردی زینب
درد اهلی دی چون یار دل آزاردی زینب
دیندیر اونی آخر سنه زواردی زینب
آغلار گوزی خم قامتی گیسوی سفیدی
ترسیم ایدر آق صفحه ده ایوان یزیدی
پروانه اگر شمع صفت شامله خوشدور
عاشق نفس گرم دل آرامله خوشدور
زینب ده بو درگاه فلک بامله خوشدور
قوی قبر شریفونده مجاور اولا باجون
دائم دوشنوب قبروه زائر اولا باجون
یوللاندی مدینه یولونا قافله قارداش
ایل گیتدی گرک منده گیدم یوخ گله قارداش
یوخ کیمسه منیم دردیمی من تک بوله قارداش
آرامگهون حسرتیله ترکنی ایتدیم
الله اوزی عالمدی که گیتدیم نجه گیتدیم
