حضرت علی اصغر ع

آل علی اصغری قارداش نجه گور شوره گَلوب

دیه سن زاده ی عمراندی گیده طوره گَلوب

ضعف دِیدی آیلوب ایمدیجه آچدی گوزینی

سسیوی آلدی بِشیکدن یره سالدی اوزینی

دلی یوخدور، علنی آندورا بُلمور سوزینی

سن بُلورسن باجون اُلسون که نه منظوره گَلوب

قورودوب سوز عطش گرچه بو گُل تک دوداقین

دوزماقی سختیدی بو زحمته دلسیز اوشاقین

اوزگه بیر نحویله امّا ایتیروب اَل اَیاقین

خبر وصل دیرسن که بو مهجوره گَلوب

آتدی نمرود اوخونی اوندا که آللهه طرف

ناامید ایلمدی حق، اونا گوستردی هدف

اصغرون جان به کف ای مهر و مه و برج شرف

بیر بیان ویرماقا اول قصّه ی مشهوره گَلوب

تنگ اولوب طائر جانبازینه بیر نوعی قفس

سسی گَلمور یغشور سینیه گیتدوقجا نفس

سارالوب رنگی، دوشوبدور چوخورا گوزلری بس

آفت باد خزان نرگس مخموره گَلوب

من گَتورماقدا علی اصغری هر چند اَخا

دگی درگاه سلیمان حقیقتده سزا

یالواروبدور آناسی بسکه محقّردی فدا

اونون امّیدیده بیر پیشکش موره گَلوب

چون شه تشنه لبین آلدی بو دللر دلینی

باجیدان اوز اَلینه آلدی او سولموش گُلینی

گوردی آثار عطش ساکت ایدوب بلبلینی

باسدی آغوشینه میدانه باخوب شوره گَلوب

گَلدی صفلر قاباقندا دوروب اول ماه تمام

اصغری اَللری اوسته اوجادوب شاه اَنام

بویوروب گوز آچون آخِر گورون ای لشکر شام

اَرِنی دلده بودا جلوه گه طوره گَلوب

نسل پیغمبر اکرمدی بو بیر قرص قمر

سودامر دور، ولی اوچ گوندی لب لعلین اَمر

بو لطافتده گُل اولماز، بو حلاوتده ثمر

نور وحدتدور نجات شب ویجوره گَلوب

نجه بو تشنه لیقا دلسیز اوشاق تاب ایلسون

بیر نفر آلسون اَلیمدن بونی سیراب ایلسون

جان ویرور، اوچ گئجه دور قویمور عطش خواب ایلسون

رنج بی خوابلوق اول قدر بو رنجوره گَلوب

ای جماعت نه علی اوغلیام عالی نسبم

نه حسینم نه آنام فاطمه دور منتخبم

سبط طاها دگلم من، بو قدر وار عربم

دیمورم جدّیمه آیات گَلوب سوره گَلوب

گوردی بو قصّه ی جانسوزی عمرسعد لعین

اَله دسمال آلوب آغلار، پوزولوب لشکر کین

اوزگه بیر دللریله دل دیور اول سرور دین

باخانون رحمی او بالی پری مکسوره گَلوب

دیدی آز قالدی که زحمتلریمیز باطل اولا

هامودان کیمدی اوخ آتماقدا اَلی قابل اولا

اوزی قابل، اوخی اوچ شعبه لی، سنگین دل اولا

بیر گمان حرمله ی کافر و مغروره گَلوب

رحمسیز حرمله مقصود عمرسعده باخوب

گوردی بیر کوکب رخشان گون اَلی اوسته آخوب

چکدی بیر نقشه خیالینده که دنیانی یاخوب

لعن حق حشره دین اول نحس آدی مذکوره گَلوب

بیر کمانیله بیر اوخ آلدی اَله همّته باخ

باخمادی حضرت پیغمبره، سن امّته باخ

اصغری ایتدی نشان آتدی اوخین، جراته باخ

چون گمان قلبه قساوت بیلَگی زوره گَلوب

قورتولوب تیر کماندان اوزی سسلندی کمان

یتدی بیر نوع نشانگاهه که تَربَندی نشان

اصغرین بیچدی بوغازین، گیچوب اوخ دگدی امان

شاه عطشان قولونا، صدمه ایکی نوره گَلوب

یتدی بو باره ده چوخ غم او شه محترمه

اوخلی قربانینی قِیتردی دوباره حرمه

سسلدی گَل باجی دوشدون گنه بیر تازه غمه

سبب کشف نکات غم مسطوره گَلوب

ایلدیم بیع و شری ای باجی جانانیله من

اصغر اوخلاندی، ولی حشره قالوب اخذ ثمن

تیره توپراقدا امانتدی بو بیر دُرّ عدن

اَلیم اوستونده سپرده اولا گنجوره گَلوب

خیمه دن دیشره چخوب غمکش عالم چکوب آه

بُلدی اصغرده او شوریله تاپوب خلوته راه

بیر اونا بیرده امامین قولونا ایتدی نگاه

گوردی بیر اوخ ضرری ناصر و منصوره گَلوب

دایان اَل ساخلا دایان صافی بویان گوزیاشنا

شاه بیتون بیله بُلمه یازیلوب اوز باشنا

گوئیا ختم مجرّبدی دوشوب سوز باشنا

آل علی اصغری قارداش نجه گور شوره گلوب