حضرت علی اکبر ع
آل طاهایه خبر ویر ای باجی اکبر گلور
قتلگهدن خیمهگاهه شورش محشر گلور
بیر آتانون یوخ بیله ناکام اؤلن نورستهسی
خیمهلرده واردی بیحد مایل دل بستهسی
مرکب اوستونده گلور خندان قیزل گُل دستهسی
یئندیرون یورقوندی آتدان رزمدن حیدر گلور
ایچماقا جام شهادت باغلیوب زرّین کمر
چشمۀ حیواندن ایچدی ویروب شیرین ثمر
گورسنور فَرقینده عیناً معجز شقّ القمر
گوئیا تاج شرافت باشدا پیغمبر گلور
گلشن پیغمبر اکرم روادور سولماسون؟
دیدۀ جام جهان اشک غمیله دولماسون؟
آچماسون لیلا نئجه بوغمده زلفون یولماسون؟
محشر کبرانی عیناً گوسترن مَنظر گلور
بانوان عصمت اُولدی خیمهدن یکسر کنار
آلدی نَجم و شَمس صُبحون دورهسین سیّارهوار
گوردولر بیر قانلو پیکردن آخار قان چشمهسار
ظاهراً قان باطناً بیر چشمۀ کوثر گلور
ایلیوب طغیان دریالر کناره داشدیلار
اُمّهات اَربَعه سس چکدیلر آغلاشدیلار
نقل ایدر راوی قویوب یئرده عبادن آشدیلار
خیمهدن نعش اوسته هی عورتدی دیده تر گلور
زینب کبری گلوب اوّل دولاندی باشینه
بیر علی نعشینه باخدی بیر حسین قارداشینه
ایتدی آهنگ نوا ویردی خبر گؤز یاشینه
بیله بولّم ایمدیده زینب علی سسلر گلور
گوردولر اعضا اولوب پاشیده زخم تیردن
محو اولوب بالمرّه یوخدور اصل ترکیب بدن
خانۀ زنبوره بنزر زخم تیر و نیزهدن
عهدهسیندن بو سؤزون نه خامه نه دفتر گلور
آلدیلار اطــرافینی عمّه باجی بیکس آنا
باش آچان زلفون یولان تقریریله گلمز سانا
لیک جمله بیر یانا نازلو سکینه بیر یانا
ایله قارداش یانینه گلسه باجی نیلر گلور
گوردولر ممکن دگل جسمینده بیرسان پردهسی
جلوۀ سینانی مستور ایلیوب قان پردهسی
مُرشد موسانی چون محو ایلیوب جان پردهسی
آیریلان شیرازهدن بیر مُصْحَفه بنزر گلور
ایعجب تیر بلا قلب جهانی دَلمدی
دوشمدی دوران مداریندن بیر آن دنجلمدی
هامّی گلدی خیمهدن لیلا کناره گلمدی
خجلتیدندن گوردی چون سلطان بییاور گلور
امر ایدوب لیلایهده گلسون امام مُحتشم
گئتدیلر اُفتان و خیزان بانوان محترم
سَسلنوردی دمبدم ایوای اوغول وای هر قدم
هانسی اوغلی گورماقا لیلا کیمی مادر گلور