حضرت زهرا س
گل سنی واقف ائدوم حکمت و اسراره قیزیم
بو قدر آغلاما پوزما منی منی مه پاره قیزیم
بئله فکر ائتمه بالا فکروزه من قالمامیشام
نچه مدّتدی که آغوشه سنی آلمامیشام
بولوسن یاره لیم گوزدن اوزوم آتمامیشام
نیلیوم باعث اولوب سینه ده کی یاره قیزیم
آتاوین فکرینه البتّه اوزون قال گجه لر
اونی دیندیر اورگیندن غمینی آل گجه لر
هر نمازونده خیاله منی ده سال گجه لر
کمک ائت غصّه لیدور حیدر کرّاره قیزیم
گجه نی خلق ائدوب الله که جهان ظلمت اولا
گوز گوزی گورمیه مظلوم آتاوا فرصت اولا
گئده چوللرده بوشالدا اورگین راحت اولا
سوزلرین چاهه دئیوب آغلیا انهاره قیزیم
هر باخیشدا دل مجروحیمی سن داغلیسان
هی گوزومدن اوپوسن اشکی یوزه باغلیسان
باخوسان یوزده کی سیلی یرینه آغلیسان
نیلورم توختادی قرباندی گوزوم یاره قیزیم
سیزه بیر کرب و بلا وار که بلا باش وئرجاق
حق اوزی آل عبایه غمی یولداش وئرجاق
کربلایه سنه بیر سویملی قارداش وئرجاق
آدی عبّاسیدی مشهور علمداره قیزیم
خوشدلم من او قد و قامت نیکو سیره
چپ باخانماز سنه بیر کیمسنه عبّاسه گوره
اودا اوغلومدی منیم بو سوزومی آل نظره
جان فدا ایلیجاق خرداجا قیزلاره قیزیم
او بالام حشره کیمی باب الحوائج اولاجاق
یوز قویان لحظه ده میدانه جمالین سولاجاق
چیگنینه مشکی گئدن وقته سکینم سالاجاق
مشکینه اوخ دگجاق مشک اولاجاق پاره قیزیم
بیر رباب آدلی گلین بو ائوه بیر گون گلجاق
اوخلانوب صود امری قلبینی محنت دلجاق
اودا بو ائوده ائله گون قباقیندا ئولجاق
اولاجاق نیسگیل اونون محنتی احراره قیزیم
