حضرت زهرا س
او گون که ایاقدان سالوبدی زهرانی
گورن یقین ائلدی ترک ائدور بو دنیانی
ئولوم توزی یوزینه قوندی سولدی سیماسی
دوشوب گوزی چوخورا سست اولوبدی اعضاسی
عبث یره او خانم صبر ائوینی یخموردی
یواش یواش دانشوردی صداسی چخموردی
علینی سسلدی اول دم کنار بسترینه
الین آلوب الینه باخدی غملی همسرینه
گوزل گوزومده عم اوغلی دئدی گوزوم واردی
یانیمدا اگلش عم اوغلی سنه سوزوم واردی
توکوب سرشکیوی سن وئرمه صبر ائوین سیله
باشین صاق اولسون عم اوغلی داریخما صبر ایله
اگرچه آیریلیرام گل کیمی بو گلشندن
اوزون بولورسن عم اوغلی که دویمادوم سندن
سنون خیالیوی بیر لحظه باشدان آتمازدوم
گلنده سن ائوه آخشام زمانی یاتمازدوم
و لیک دوشدوم ایاقدان جفائیله بیردن
گذشت ائله نچه گوندور دورانمورام یردن
فدک سوزون هله سالما غمیله یانیمده
قباله ده سنه قربان فدکده جانیمده
وفالی دلبر اولان دلبریندن اوز دوتماز
بو شرعی مسئله دور همسریندن اوز دوتماز
منی گذشت ائله مه طلعتیمی گیزلدیرم
سنی نظرده دوتوب صورتیمی گیزلدیرم
سوروشما هاردا منه دمبدم خطر گلدی
خدا بولور قاپیدا باشیمه نلر گلدی
غروب اولاندا عم اوغلی جهانی داغلاردوم
بهانه محسنودی سندن اوتری آغلاردوم
