زبانحال حضرت ام لیلا به حضرت علی اکبر
منای عشقه طرف اکبریم یواش قدم آت
باخور دالینجه آنان دلبریم یواش قدم آت
گوزل بالام دئمورم بزم یاره تز گئتمه
دونوب گوز آلتی باخوب قلبمی کباب ائتمه
دلیم دیور گوزلیم گئت اورک دیور گئتمه
دوشوبدی بنده دلیم دلبریم یواش قدم آت
اگرچه ظلم ائوینی یخماقا گرگ چالیشاخ
بیرآزدا صبرائله قوی نار فرقته آلیشاخ
فراق عالمدی گل آنا بالا دانیشاخ
اورکده قویما قالاسوزلریم یواش قدم آت
دانشدیرام سنی بو آه جانگزا قویمور
ائشتمورم سسیوی ناله وبُکا قویمور
دالونجه یوخسا قاچاردیم اوغول حیا قویمور
دونوبدی قانه سرشک تریم یواش قدم آت
گئدورسن ایندی کیمین سایه سنده دالدالانیم
گرک ئولونجه علی نار فرقتونده یانیم
توقف ایله بیرآز باشیوه گلیم دولانیم
گلنمورم تتیور دیزلریم یواش قدم آت
روادی سن کیمی گور مَه‌جمالدن اَل اُوزَم
آدون دلیمده دوشوب چوللره دالونجه گزم
جهاندا آیریلیقا کیم دوزوبدی منده دوزم
شبیه حضرت پیغمبریم یواش قدم آت
بله خیال ایلمه لیلی ایلمور شیون
مقیّدم اوجادان آغلیام باخورعمّه‌ن
سفارش ایله،بی‌بون گوز گوتورمسین مندن
آدون دلیمده اولوب ازبریم یواش قدم آت
دئسم جمالیوه آی آیدا بو ضیاء اولماز
گونه شبیه ائلسم صورتون روا اولماز
دوشوبدی لیلینی بیر درده که دوا اولماز
اورک باشندا قالوب اللریم یواش قدم آت
دئسم که گئتمه اوغول نقص عشق اولار بو سوزوم
دئسم که گیت دوزرم هجریوه نه نوعی دوزوم
اجازه وئرسن علی باشیوه دولانام ئوزوم
جمالی آی کیمی خوش منظریم یواش قدم آت
گوزل یارادوب اَزلدن اوغول سنی یارادان
نجه اُوزُوم اَلیمی سن کیمی گوزل بالادان
باخولار عمّه‌لرون آغلیانمورام اوجادان
فدااولوم بوییُوا اکبریم یواش قدم آت
دئدیم قوجالسام علی واردی سن کیمی کمکیم
بوفکری ائتمزدیم هیچ،اولار قرا لچگیم
اَلیوی سینه‌مه قوی گور نه چرپنور اورگیم
اورک دویونمه دوتوب یاوریم یواش قدم آت
