حضرت علی اصغر ع

ولمم ندن بو گئجه بس سحر اولماز

من تک بالاسیندان هیچ آنا بی خبر اولماز

 

ای صرصر غم گیت پوزولان گلشنه ساری

سال بیر یولوی پرپر اولان سوسنه ساری

اوردان گلومون عطرون آلوب اَس من ساری

یِل اسدیقیجا قلبیم اَسر بی ثمر اولماز

 

من شام غریبانیمی صبحه کیمی قورّام

هی اوز اوزومه گاهی دوروب گاهی اوتورّام

پرپر گلومی یاده سالوب باشیمه ورّام

قلبیم دئیر آت فکرینی روحیم دئیر اولماز

 

رؤیا که گلر گوزلریمه سینه می داغلار

هوشه گئدرم غم یوزومه هر یولی باغلار

گورّم یوخودا خردا بشیکده بالام آغلار

لایلای سسیمه آینیرام امّا ثمر اولماز

 

هر چند کیچیک هَدیم آغیر قیمته گئتدی

امّا آناسین سالدی بیوک محنته گئتدی

ایوای منه گهواره سیده غارته گئتدی

هانسی ننه دوشدی بو غمه خونجگر اولماز

 

گل اصغریم آهیله سینون داغلامارام گل

سن آغلاسان آغلا اوجادان آغلامارام گل

وور سینمه دیرناق الوی باغلامارام گل

اَم صود پایوی گیت سنه که دردسر اولماز

 

چکدون منی صحرایه اوغول بخت اطاقیندان

قوش تک اوزون اوچدون بو ربابین قوجاقیندان

یاد اولسون او گونلر که اوپردیم دوداقیندان

اوپدوقجا دئیردیم بئله شیرین شکر اولماز