احوالات حضرت رباب س
سالوبدی دست قضا گویلومون شهاب ائوینه
خراب ائدوب تاپوب اَل من خراب ائوینه
اوتا چکوبدی وجودیم یانور کویر کیمی
چتیندی بیرده گئده اَل تاپا زهاب ائوینه
گلون منی آپارون من داریخمیشام گئدورم
بیر آیری یرده سالام دردون انقلاب ائوینه
گلون دوتون الیمی بو دیاریدن باش آلاخ
گئداخ مدینه ده بیز مالک الرقاب ائوینه
اَلی اورکده قالان صود امر بالاسی ئولن
عروس حضرت زهرا ، بوتراب ائوینه
سیاه پوش اولوب قاره پرچمیله گئداخ
اوزوموزی یتوراخ تا او دل کباب ائوینه
دویاخ او شهریده بیر بیر قاپولاری سوروشاخ
نشان وئره بیزه هاردان گئدور رباب ائوینه
سو جامی اَلده لبالب ائداخ یول اوستونده
سوئیله تا آپاراخ بیز ربابون آب ائوینه
سپاخ سو قاپوسینا ، هر گورن خیال ائتسون
تاپوبدی فیض یاغوب نم نمِ سحاب ائوینه
یواش دویاخ قاپونی سعی ائداخ که دوشمیه تا
بلا چولونده کی تک بیرده اضطراب ائوینه
یازوبلا بو خانمون راز عمرون اهل قلم
مدینه ده نچه ایل دوشدی التهاب ائوینه
یوخیدی کولگه یره خوشلوقی قویاردی یوزون
سحردن آخشاما تک اوتلی آفتاب ائوینه
تک اگلشردی تک آغلاردی تک دوتاردی عزا
سالاردی تک جانینا درد بی حساب ائوینه
تهیّه ایتموشودی بیر بشیک فقط اونلان
باشین قاتاردی سالاردی اوت اول جناب ائوینه
چخاردی کوچیه گئتسون بقیعده آغلاماقا
وئرردی غم یوز آچاردی الین قطاب ائوینه
گورردی هر آنا آغوشینه آلوب بالاسین
دوباره دن قییدردی او با شتاب ائوینه
یوزون قویاردی یره سس چکردی آغلاردی
گینه ائدردی غم و دردی انجذاب ائوینه
سپردی باشینه توپراقلاری دئیردی بالا
غون سالوب آناوون سنگ آسیاب ائوینه
اوقدری آغلامیشام ائوده اِئو گلوب تنگه
یقین منی ائدجاق بیر گون اِئو جواب ائوینه
قالوبسان هاردا گوزوم آختارور سنی گَل گور
نئجه سالوبدی فلک اوت ائدوب مجاب ائوینه
تاپانمورام بالا بیر یر داریخمیشام ائوده
قویوبدی لانۀ دل تنگیمون غراب ائوینه
مدینه یوردی منی ، من مدینه نی گَل آپار
گئداخ نجفده یاتان شاه بوتراب ائوینه
گیدم بقیعه نه وقت کوچیه اَیاق قویورام
یاغور فضادن اوغول گویلومون زکاب ائوینه
او گونکی شادلیقی ، دردی ، ائدوردولر قسمت
آناوین ائتدی فلک درد انتخاب ائوینه
گوزوم هارا دوشوری اوردا شکلیوی گورورم
بلا شراره چکور گویلومون غیاب ائوینه
یریمدون قاباقیمجا اَیاق دوتوب قاچاسان
سنی قوناق آپارام دخت شیر غاب ائوینه
گئدنده یولدا دوتام دسته گُل وئرم سپه سن
یتنده زینب مظلوم دلکباب ائوینه
منیم کیمی اودا دائم اوغول سنه آغلار
قرا چکوب سنه خاطر او مستطاب ائوینه
ایمکلماقیوه اول قدر شعرلر دئموشم
اورگیمون هاموسین یغمیشام کتاب ائوینه
سنی الیمندن آلانون اولیدی اللری شل
دوشیدی حرمله نون آتش عذاب ائوینه
سنون یاشینداکی لار کوچه ده ایاب ایلور
ایاق دوتوب ائدور کوچه ده ذهاب ائوینه
اولاری کوچه گورّم قاچولّار اوینولّار
ایاق قویار اورگیم اوندا اشک ناب ائوینه
ائله فغان ائدرم نالمه آنان زهرا
بقیعدن گوتورب باش گلر رباب ائوینه
او بی خرد که سنه «گلشنی» دوتوب ایراد
خدا اونو سالاجاق آتش عذاب ائوینه
